‘मिग 232’ ठरणार विद्यार्थ्यांचे आकर्षण

पिंपरी-चिंचवड : महापालिकेच्या पुढाकाराने सायन्स पार्कमध्ये ‘मिग 232’ हे लढाऊ विमान आणण्यात आले असून, ते सायन्स पार्कच्या प्रवेशद्वारावर बसविण्यात येणार आहे. त्यामुळे हे लढाऊ विमान जवळून अभ्यासण्याची संधी विद्यार्थ्यांना मिळणार आहे. भारतीय हवाई दलामध्ये अभिमानास्पद कामगिरी करणारे हे विमान चिंचवड येथील विज्ञान केंद्रात (सायन्स पार्क) दाखल झाले आहे. शहरवासीयांना विज्ञानाबरोबरच तंत्रज्ञान, भारतीय लष्कराचीही माहिती व्हावी, हा त्या मागील उद्देश आहे.

रशियन बनावटीचे विमान
विज्ञान केंद्राच्या प्रवेशद्वारजवळ हे विमान बसविण्यात आले आहे. त्यासाठी स्वतंत्र प्लॅटफॉर्म तयार करण्यात आला आहे. उत्तरेकडे आकाशाच्या दिशेने या विमानाची झेप दाखविली आहे. जवळपास आठ कोटी किंमतीचे हे विमान आहे. सध्या देशसेवेतून निवृत्त झालेले हे विमान ओझर येथून चार टप्प्यात आणले गेले आहे. तेथून तीन तुकड्या या विमानासाठी करण्यात आल्या. मिग 232 हे रशियन बनावटीचे विमान आहे. कारगिल युद्धामध्ये त्याचा वापर केला होता. लढाऊ विमान उपलब्ध करून द्यावे, अशा आशयाचा पत्र व्यवहार विज्ञान केंद्राने केला होता. त्यामध्ये विमान देण्याची वायु दलाने तयारी दर्शविली. विमान बसविण्याची तयारी अंतिम टप्प्यात आहे.

विनाशुल्क मिळाले विमान
मिग 232 हे विमान भारतीय वायू सेनेकडून मिळाले आहे. हे विमान विनाशुल्क देण्यात आले आहे. विमानाची पुढील देखभाल, दुरुस्तीची जबाबदारी विज्ञान केंद्राची आहे. दोन माणसे बसू शकतील, अशी त्याची रचना आहे. सध्या त्यामध्ये इंजिन नसले, तरी लढाऊ विमान प्रत्यक्ष कसे दिसते, त्यातील अंतर्गत रचना कशी असते, त्याचे कार्य कसे चालते, याची माहिती सर्वांना मिळणार आहे, अशी माहिती महापालिकेचे सह शहर अभियंता प्रवीण तुपे यांनी दिली.