मितालीचे महिला क्रिकेटविश्वावर ‘राज’ !

जळगाव (स्वप्निल सोनवणे) – भारतीय महिला क्रिकेट संघाची कर्णधार मिताली राजने नुकतेच महिला एकदिवसीय आंतरराष्ट्रीय क्रिकेटमध्ये सर्वाधिक धावा करण्याचा विश्वविक्रम नोंदवला असून यामुळे महिला क्रिकेट संघही पुरूष क्रिकेट संघाला ‘हम भी किसीसे कम नही’ असे म्हणताना दिसत आहे.

इंग्लंडमध्ये सुरू असलेल्या महिला क्रिकेट विश्वचषकातील अॉस्ट्रेलियाविरूध्दच्या सामन्यात मितालीने हे धावांचे शिखर गाठले असून ६ हजार धावा करणारी मिताली राज पहिलीच महिला क्रिकेटपटू ठरली आहे.मितालीने इंग्लंडची माजी महिला क्रिकेटर चार्लोट एडवर्डचा विक्रम मोडीत काढला.एडवर्डने १९१ एकदिवसीय सामन्यातील १८० डावात ५,९९२ धावा केल्या आहेत.मितालीने एडवर्डला १८३ सामन्यातील फक्त १६४ डावांमध्येच मागे टाकत ६ हजाराचा टप्पा गाठला.

मितालीने आपल्या एकदिवसीय कारकीर्दीत आतापर्यंत ५ शतके तर ४८ अर्धशतके झळकावली असून मितालीचे हे पाचही शतकांमध्ये भारतीय महिला संघ अजिंक्य राहिला आहे,हे विशेष.भारतीय महिला क्रिकेटची ‘सचिन’ असलेल्या मितालीच्या या विश्वविक्रमामुळे महिला क्रिकेट संघाला नक्कीच उभारी मिळणार असून पुरूष संघाप्रमाणेच महिला क्रिकेटपटूही सध्या यशस्वी भरारी घेताना दिसत आहेत.

दिग्गज पुरूष खेळाडूंनाही पछाडले !

मिताली राजने सर्वाधिक धावांचा विक्रम नोंदवत केवळ महिला क्रिकेटरच नव्हे तर पुरूष क्रिकेटपटूंनाही पछाडले आहे.मितालीने १८३ सामन्यांमध्ये केवळ १६४ डावात ६ हजार धावा पूर्ण केल्या.विशेष म्हणजे क्रिकेटचा देव असलेल्या सचिन तेंडूलकरला ६ हजार धावांचा टप्पा गाठण्यासाठी १७० डाव खेळावी लागली होती.तसेच भारताचा सर्वात यशस्वी कर्णधार राहिलेल्या महेंद्रसिंग धोनीने ६ हजार धावा पूर्ण करण्यासाठी १६६ डाव खेळले होते.सचिन व धोनीव्यतिरिक्त मितालीने अॉस्ट्रेलियाचा महान खेळाडू रिकी पॉन्टींग,वीरेंद्र सेहवाग,युवराज सिंग,ब्रँडन मैक्युलम,दिलशान,हर्षल गिब्ज आदी महान पुरूष क्रिकेटपटूंना याबाबतीत पछाडले आहे.

सर्वाधिक अर्धशतकांवरही ‘राज’

मितालीने आतापर्यंत १८३ वनडे सामने खेळले असून यात मितालीची धावांची सरासरी ५१.६८ अशी दमदार आहे.आपल्या ४८ अर्धशतकांसह महिला क्रिकेटमध्ये सर्वाधिक अर्धशतकांचा विक्रमही मितालीच्याच नावावर आहे.सलग सात सामन्यात अर्धशतके झळकावण्याचा विश्वविक्रमही मितालीने नुकताच नोंदवला आहे.

महिला क्रिकेटची ‘सचिन तेंडूलकर’

भारतीय महिला क्रिकेटची ‘सचिन तेंडूलकर’ म्हणून प्रचलित असलेल्या मिताली राजचे अनेक विक्रम हे थक्क करणारे आहेत.मितालीच्या १८३ वनडेत ६ हजार धावा तसेच १० कसोटी सामन्यात ६६३ धावा व ६३ टी-२० सामन्यात १७०८ धावा आहेत. राजस्थानमधील जोधपूरच्या ३४ वर्षीय मितालीने आपल्या एकदिवसीय क्रिकेटची सुरूवात २८ जुन १९९९ मध्ये आयर्लंड संघाविरूध्द केली होती.पहिल्याच सामन्यात शतक झळकावून मितालीने क्रिकेटप्रेमींचे लक्ष वेधले होते.