मी वर्गातील सर्वात ‘ढ’ विद्यार्थी : कुमारस्वामी

बेंगळुरू । ‘मी अभ्यासात मठ्ठ होतो. पहिल्या बाकावर बसल्यावर शिक्षक प्रश्‍न विचारायचे. त्याची मला भीती वाटायची आणि उत्तर येत नसल्यामुळे माझी भंबेरी उडायची. मुलेही हसायची. म्हणून मी शाळेत नेहमीच शेवटच्या बाकावर बसायचो,’ अशी दिलखुलास कबुली कर्नाटकचे मुख्यमंत्री कुमारस्वामी यांनी येथे दिली.

जयनगर येथील नॅशनल डिग्री कॉलेजच्या माजी विद्यार्थ्यांच्या संमेलनाला संबोधित करताना कुमारस्वामी यांनी ही कबुली देताच अनेकांची तोंडे पाहण्यासारखी झाली. विज्ञान शाखेचे पदवीधर असलेले कुमारस्वामी 12 वर्षानंतर नॅशनल डिग्री कॉलेजमध्ये आले होते. यावेळी जुन्या आठवणींना उजाळा देताना त्यांनी अनेक किस्से सांगितले. ‘मी अभिनेते डॉ. राजकुमार यांचा मोठा फॅन होतो. त्यांचा प्रत्येक चित्रपट पाहायचो,’ असं सांगतानाच ‘जर मी चांगला विद्यार्थी असतो, तर आयएएस अधिकारी झालो असतो. पण घडायचं काही औरच होतं,’ असे ते म्हणाले.

‘माझे वडील मला नेहमीच मी निरुपयोगी व्यक्ती असल्याचे बोलायचे. मी आयुष्यात कधीच प्रगती करणार नाही, असेही ते म्हणायचे. पण मी राजकारणात प्रवेश घेतला आणि पहिल्यांदा खासदार झालो. कठोर परिश्रमामुळेच मी हा पल्ला गाठू शकलो. मला वाटते राजकारणी म्हणून मी नशीबवानच आहे,’ असे ते म्हणाले. मला भेटण्यासाठी विद्यार्थ्यांना कोणत्याही परवानगीची गरज नाही. तुम्ही केव्हाही मला बिनदिक्कतपणे भेटू शकता, असेही त्यांनी स्पष्ट केले.