मुंबईच्या समुद्रात विमानाचे लँडिंग

मुंबई : मुंबईच्या समुद्रात पहिल्या जलवाहतूक विमानाचे शनिवारी लँडिंग झाले. दोन घिरट्या घालून विमानाचे लँडिंग केले. विमानाची भारतातील ही तिसरी चाचणी असून देशातले हे पहिलेवहिले सी प्लेन मुंबईतील गिरगाव चौपाटीवर उतरविण्यात आले. यावेळी मुख्यमंत्री देवेंद्र फडणवीस, केंद्रीय दळणवळण मंत्री नितीन गडकरी, केंद्रीय उड्डाण वाहतूक मंत्री अशोक गजपती राजू उपस्थित होते. या विमानाची विशेषता म्हणजे जमीन आणि पाणी अशा दोन्ही ठिकाणी हे विमान लँड करता येते. स्पाईसजेट कंपनीची ही सी प्लेन आहेत. अशी तब्बल 100 सी प्लेन सुरु करण्याचा स्पाईसजेटचा विचार आहे. या विमानात 10 ते 14 जण प्रवास करु शकतात. सी प्लेनमुळे प्रादेशिक कनेक्टीव्हिटी वाढण्यास मदत होईल. शिवाय आपत्कालीन परिस्थितीतही या विमानाचा वापर करता येईल. पर्यटन विकासालाही याचा फायदा होईल, असे स्पाईसजेटने म्हटले आहे.