मुंबईतील ४३२ जुन्या इमारतींच्या पुनर्विकास प्रकल्पांची एसआयटी मार्फत चौकशी होणार
मुंबई – मुंबईतील ४३२ जुन्या इमारतींच्या पुनर्विकासाचे प्रकल्पांची एसआयटी मार्फत चौकशी करण्यात येईल, तसेच जे प्रकल्प १० वर्षांपेक्षा जास्त रखडले आहेत अशा प्रकल्पांची विकासकांना दिलेली परवानगी एसआरए च्या धर्तीवर रद्द करण्यात येईल, अशी घोषणा गृहनिर्माण राज्य मंत्री रवींद्र वायकर यांनी आज विधानसभेत केली, ही मागणी मुंबई भाजप अध्यक्ष आमदार आशिष शेलार यांनी केली होती.
मुंबई शहर आणि उपनगरातील उपकरप्राप्त इमारतींच्या पुनर्विकासाकरिता विकास नियंत्रण नियमावली ३३(७) अंतर्गत पुनर्विकासाची परवानगी देण्यात येते. या प्रकल्पांना म्हाडा तर्फे अतिरिक्त एफएसआय देण्यात येतो, जेणेकरून अशा प्रकल्पांमध्ये सर्वसामान्यांना परवडतील अशी घरे निर्माण होतील. मुंबईत ना-हरकत प्रमाणपत्र दिलेली ३३ प्रकरणे वगळता ४३२ प्रकल्पांकरिता म्हाडाने १,५६,५२०.४१ चौ.मीटर इतके अतिरिक्त बांधकाम क्षेत्रफळ दिले. त्यापैकी ३१,३१९.७९ चौ.मी इतके बांधकाम क्षेत्रफळ म्हाडास प्राप्त झाले. मुंबईत असे बहुतांश प्रकल्प विकासकांनी घेतले, आपली बॅलेन्सशिट वाढवली, विविध वित्तीय संस्था मार्फत कर्ज घेतली, प्रकल्पांची कामे सुरु केली नाहीत तर काही जणांनीपूर्ण केली नाहीत. त्यामुळे रहिवाशांना घरे मिळाली नाहीत. सुमारे १६ लाख चौ.फुट एवढे क्षेत्रफळाची घरे म्हाडाला देणे बंधनकारक असताना ते देण्यात आले नाही, ज्याची किंमत सुमारे ६००० कोटी रुपये होते सर्वसामान्य मुंबईकरांना परवडणारी घरे मिळवीत म्हणून हा अतिरिक्त एफएसआय देण्यात येतो तर प्रत्यक्षात मुंबईकरांची फसवणूक झाली आहे, त्यामुळे याप्रकरणी एसआयटी गठीत करून चौकशी करण्यात यावी, तसेच जे प्रकल्प १० वर्षांपेक्षा जास्त काळ रखडले आहेत त्यांची एसआरएच्या धर्तीवर परवानगी रद्द करण्यात यावी अशी मागणी मुंबई भाजप अध्यक्ष आमदार आशिष शेलार यांनी विधानसभेत केली. याबाबत त्यांनी तारांकित प्रश्न उपस्थित केला होता. त्याला उत्तर देताना गृहनिर्माण राज्यमंत्री रवींद्र वायकर यांनी अनेक विकासकांनी म्हाडा घरे दिली नसल्याचे मान्य केले तसेच अनेक प्रकल्प रखडले असल्याचे निदर्शनास आल्याचे सांगितले त्यामुळे आत्तापर्यंत परवानगी देलेल्या ४३२ प्रकल्पांची एसआयटी मार्फत चौकशी करण्यात येईल, जे प्रकल्प १० वर्षांपेक्षा जास्त काळ रखडले आहेत त्यांची परवानगी रद्द करण्यात येईल असे घोषित केले.
प्रशांत डिंगणकर – 9594958123