मुंबईत इमारतीवरून पडून पत्रकार आदर्श मिश्रा यांचा मृत्यू

मुंबई : मुंबईतील गोरेगावमध्ये राहत्या इमारतीच्या टेरेसवरून पडून पत्रकार आदर्श मिश्रा यांचा मृत्यू झाल्याची घटना घडली आहे. आदर्श मिश्रा हे एका इंग्रजी मासिकाचे व्हॉइस प्रेसिडेंट म्हणून काम पाहत होते. मात्र, हा अपघात आहे की घातपात याबाबत पोलीसांचा तपास सुरू आहे.

आदर्श मिश्रा आपल्या कुटुंबीयासोबत गोरेगाव परिसरातील सिद्धार्थ नगरात राहत होते. ते दररोज मॉर्निंग वॉक करण्यासाठी आपल्या इमारतीच्या गच्चीवर जात असत. आजही सकाळी ते मॉर्निंग वॉकसाठी आपल्या ७ मजली इमारतीच्या गच्चीवर गेले होते. मात्र, वॉक दरम्यान इमारतीच्या गच्चीवरून खाली कोसळले. त्यांना तातडीनं जवळच्या सिद्धार्थ हॉस्पिटलमध्ये दाखल करण्यात आले. मात्र त्यांचा मृत्यू झाल्याचे घोषित करण्यात आले. गोरेगाव पोलिसांनी मिश्रा यांचा मृतदेह ताब्यात घेतला असून पोलिसांनी हा अपघाती मृत्यू असल्याची नोंद केली आहे. मिश्रा यांच्या मृत्यूबाबत पोलीस पुढील तपास करत आहेत. मिश्रा यांना मीडिया आणि एंटरटेन्मेंट ब्रँड क्षेत्राचा १८ वर्षांचा अनुभव आहे. मिश्रा यांनी ‘VIVA इस्टिट्यूट ऑफ मॅनेजमेंट अँण्ड रिसर्च’ या संस्थेचे संचालक म्हणूनही काम पाहिले आहे. आज ६ जानेवारी, अर्थात पत्रकार दिनीच एका पत्रकाराचा मृत्यू झाल्याने परिसरात हळहळ व्यक्त करण्यात येत आहे.