मुंबईत पडझडीच्या घटनात 6 जण जखमी

मुंबई । मुंबईत पावसाळ्यात इमारत व भिंती पडण्याच्या घटना घडतात. मात्र आता पाऊस नसतानाही पडझडीच्या घटना सुरुच आहेत. कुर्ला येथे एका इमारतीच्या खोलीच्या प्लास्टरचा भाग पडल्याने 4 जण जखमी झाले तर सांताक्रूझ येथील जुहूतारा रोडवर झाड कोसळल्याने 2 जण जायबंदी झाले. मुंबईत दरवर्षी पावसाळ्यात झाडे तसेच झाडांच्या फांद्या कोसळण्याच्या घटना घडतात. तसेच घरे भिंतीचा भागही पडण्याचा घटना घडतात. मुंबईत सध्या पाऊस नाही मात्र पडझडीच्या घटना सुरूच आहेत विशेषतः झाडे उन्मळून पडणे झाडांच्या फांद्या कोसळणे सातत्याने सुरूच आहे. त्याचप्रमाणे शॉर्टसर्किटच्या तक्रारीही सतत येत आहेत. या सततच्या अपघातांमुळे महापालिका प्रशासनावर ताण आला आहे. तसेच, यामुळे जीवितहानीही होत असल्याने हे अपघात गंभीर स्वरूपाचे समजले जात आहेत. म्हणून मुंबईतील रहिवाशी इमारती असो किंवा रस्त्यावरील झाडे असो सर्वच धोकादायक बनल्याने नागरिकांमध्ये भीतीचे वातावरण पसरले आहे.

जखमींवर तातडीने उपचार
रविवारी सायंकाळी साडेसहाच्या सुमारास कुर्ला पश्‍चिम हलावपुल, माकडवाला कम्पाउंड येथील साई शंकर चाळ या तळ मजला अधिक एक मजला असे बांधकाम असलेल्या इमारतीच्या खोली क्रमांक 3च्या अँगल व प्लास्टरचा भाग पडला या घटनेत 4 जण जखमी झाले. त्यांना उपचारासाठी राजावाडी रुग्णालयात दाखल करण्यात आले. उपचारानंतर त्यांना घरी पाठवण्यात आले. नसरीन खान (32), रुकसाना खान (29), दानिश खान (15) व शहाबाद खान (3) अशी या घटनेतील जखमींची नावे आहेत.

24 तासांत 8 शार्टसर्किटच्या घटना
गेल्या 24 तासात शहर व उपनगरात एकूण 8 ठिकाणी शॉर्टसर्किटच्या घटना घडल्या तर 9 ठिकाणी झाडे, झाडांच्या फांद्या पडण्याचा तक्रारी प्राप्त झाल्या. सांताक्रूझ पश्चिम, जुहूतारा रोड येथील मानीकजी कूपर शाळेसमोर काल सायंकाळी झाड कोसळल्याने 2 जणांना दुखापत झाली. आनंद कनोजिया (36) व जितेश परदेशी (31) अशी जखमींची नावे आहेत त्यांच्यावर कूपर रुग्णालयात उपचार करण्यात आले. दरम्यान, शनिवारी चेंबूर येथील सिद्धार्थ कॉलनीत झाड पडल्याने 3 महिला जखमी झाल्या होत्या, त्यानंतर दुसर्‍या दिवशी पुन्हा अशीच घटना घडल्याने मुंबईकरांमध्ये भीतीचे वातावरण पसरले आहे.