मुंबईत पुन्हा जोरदार पाऊस

मुंबई-मुंबईकरांच्या आठवड्याची सुरुवात पुन्हा एकदा जोरदार पावसाने झाली आहे. पहाटे मुंबई आणि उपनगर परिसराला पावसाने झोपडून काढले आहे. स्कायमेटच्या अंदाजानुसार पुढील २४ तासात उत्तर आणि पश्चिम उपनगरामध्ये जोरदार पावसाची शक्यता वर्तवण्यात आली आहे. दक्षिण मुंबईत पावसाने थोडीशी उसंत घेतली आहे. मात्र ठाणे, डोंबिवली, कल्याण, बदलापूर, अंबरनाथ या उपनगरांमध्ये मुसळधार पाऊस सुरू आहे. एवढेच नाही तर कोकणासह राज्यातील इतर भागातही पावसाचा जोर कायम आहे.

हळूहळू पावसाने आपला मोर्चा मराठवाड्याकडेही वळवला आहे. आठवड्याच्या सुरूवातीलाच पावसाने जोरदार हजेरी लावली आहे. शनिवार आणि रविवार मुंबईसह उपनगरांमध्ये जोरदार पाऊस होताच. रविवार रात्रीपासून पावसाची बॅटिंग पुन्हा सुरू झाली आहे. नालासोपारा भागात पाणी साठल्याचीही माहिती समोर आली आहे. येता आठवडाभर पावसाचा जोर कायम राहिल असा अंदाज हवामान विभागाने वर्तवला आहे. मागील १५ तासांमध्ये मुंबई महापालिकेच्या ६० स्वयंचलित पर्जन्यमापन केंद्रांपैकी अनेक केंद्रांवर १५० मिमी पेक्षा जास्त पावसाची नोंद झाली. रविवारी झालेल्या पावसामुळे मुंबईतील रस्त्यांवर पाणी साठले होते. अँटॉप हिल, परळ, एलबीएस मार्गावरील शीतल सिनेमा या ठिकाणी पाणी साठले होते. तर पश्चिम उपनगरांपैकी गोरेगावातील सिद्धार्थ नगर, मिलन सबवे, वांद्रे येथील नॅशनल कॉलेज या ठिकाणीही पाणी साठल्याचे बघायला मिळाले. त्याचप्रमाणे घाटकोपर येथील नित्यानंद नगर, चेंबूर नाका, हिंदमाता फ्लायओव्हर, अमर महल जंक्शन, पवई या ठिकाणीही पाणी साठले होते.