मुंबईत मोबाईल चोरांचा सुळसुळाट

मुंबई । फटका गँगच्या दोन जणांना पोलिसांनी मोबाईल चोरी प्रकरणात ताब्यात घेतले. लांब पल्ल्याच्या रेल्वे गाड्यात प्रवास करणार्‍या प्रवाशांचे मोबाईल, तसेच सेन्ट्रल रेल्वेने प्रवास करणार्‍या प्रवाशांचे मोबाईल ही गँग चोरत होती. फटका गँगच्या या दोन जणांना कल्याण रेल्वे स्टेशनवर अटक करण्यात आली आहे, आता हे आरोपी न्यायालयीन कोठडीत आहेत. फटका गँगच्या या दोन्ही जणांची ओळख पटली आहे. यातील एकाचे नाव अजित झडे, तर दुसर्‍याचे नाव दीपक ठोकळ आहे. हे फटका गँगमधील असल्याची प्राथमिक माहिती आहे, असे रेल्वेचे पोलीस अधिकारी समाधान पवार यांनी म्हटले आहे. या गँगला ‘फटका गँग’ यासाठी म्हणतात की, जेव्हा रेल्वे सिग्नलवर उभी असेल किंवा प्लॅटफॉर्मवरून लोकल नुकतीच निघत असेल, तेव्हा दारावर स्टाईलने मोबाईलवर बोलणार्‍यांच्या हाताला फटका मारून ही गँग मोबाईल लांबवते. अनेकवेळा काठीने देखील मोबाईल हातात असणार्‍या हाताला हे फटका गँगवाले फटका मारतात.

आरोपींकडून 20 पेक्षा जास्त मोबाईल हस्तगत
मागील काही आठवड्यापासून कल्याण रेल्वे पोलिसांकडे मोठ्या प्रमाणात या तक्रारी येत आहेत, असे पोलीस अधिकारी समाधान पवार यांनी सांगितले. काही दिवसांपूर्वी त्यांनी आरोपी अजित झडे व दीपक ठोकळ या दोघांना ताब्यात घेतले. या दोनही आरोपींकडून 20 पेक्षा जास्त चोरीचे मोबाईल जप्त करण्यात आले आहेत. यात विविध ब्रॅण्डचे मोबाईल आहेत. कल्याण रेल्वे पोलिसांकडे या काळात 10 पेक्षा जास्त मोबाईल चोरीच्या केसेस आल्या होत्या. रेल्वे पोलिसांनी आणखी दोन जणांना मोबाईल चोरी प्रकरणी अटक केली आहे. यात आरोपी गौतम सोनवणे आणि संजय मोरे यांचा समावेश आहे. चोरीचे मोबाईल फोन विकण्याचा गुन्हा या आरोपींवर दाखल करण्यात आला आहे.

‘सलमान खान’ मोबाईल चोराला ठरला फायद्याचा
अभिनेता सलमान खानच्या मुंबईतील घरासमोर, गॅलेक्सी अपार्टमेंटसमोरून 19 वर्षाच्या युवकाने 12 मोबाईल लांबवले. सलमान खान जोधपूर जेलमधून सुटून आला, त्यावेळी त्याच्या घरासमोर त्याच्या फॅन्सची गर्दी झाली होती, सलमान त्याचे फॅन्स हात देण्याच्या गोंधळात असताना, या मुलाने चक्क 12 मोबाईल लांबवले. मुंबईतील वांद्रे येथील गॅलेक्सी अपार्टमेंटसमोर हा प्रकार घडला. या मोबाईल चोरी प्रकरणी पोलिसांनी विशाल यादव या 19 वर्षाच्या युवकाला अटक करण्यात आली.

पोलिसांनी रात्री केली अटक
या गर्दीत आणखी काही मोबाईल चोर होते का याचा शोध पोलीस घेत आहेत. या गर्दीत मोबाईल चोरीला गेल्याची तक्रार आल्यानंतर पोलिसांनी तपासाला सुरूवात केली. पोलिस अधिकार्‍यांनी दिलेल्या माहितीनुसार, विशाल यादवला रात्रीच्या पोलीस पेट्रोलिंग टीमने शनिवारी रात्री हेरले आणि त्याने केलेल्या गुन्ह्याची कबुली दिली. आरोपी विशाल यादवला स्थानिक कोर्टात हजर करण्यात आले, त्याला न्यायालयाने पोलीस कोठडी सुनावली असल्याचे पोलिसांनी सांगितले.

काही मिनिटात विशाल यादव या मुलाने केली हातसफाई
पोलिसांनी दिलेल्या माहितीनुसार, वांद्रे पूर्वला राहणार्‍या विशाला यादवने, सलमानच्या घरासमोर वांद्रे पश्‍चिमला गर्दीच्या खिशातून 12 मोबाईल फोन लांबवले, विशाल यादवने ही हातसफाई काही मिनिटात केली. आपल्या आवडत्या अभिनेता 1998 च्या काळवीट शिकार प्रकरणात, 2 दिवस जेलची हवा खाऊन परत आल्याचा आनंद फॅन्सना होता. सलमान खानला वेलकम करत असताना त्याने हा कारनामा केला.

12 पैकी 2 मोबाईल पोलिसांनी केले हस्तगत
यादव या बॅण्डस्टॅण्ड गॅलेक्सी अपार्टमेंटच्या गर्दीच्या खिशातून, पर्समधून मोबाईल लंपास करत होता. आम्ही त्याच्याकडून 2 मोबाईल फोन हस्तगत केलेले आणि 10 मोबाईल फोन त्याच्याकडून हस्तगत करण्याचे काम सुरू असल्याचे पोलिसांनी सांगितले. वांद्रे पोलीस स्टेशनचे सिनिअर इन्स्पेक्टर पंडित ठाकरे यांनी ही माहिती दिली.