मुंबई आयकर विभागातील आयुक्तांना लाच प्रकरणात अटक

मुंबई । मुंबई आयकर विभागातील एका मोठ्या अधिकार्‍याला लाच घेतल्याप्रकरणी अटक करण्यात आली आहे. दिल्ली सीबीआयच्या लाचलुचपत प्रतिबंधक विभागाने, आयकर खात्यातील अपील विभागाचे आयुक्त बी. व्ही. राजेंद्र प्रसाद यांच्यासह सहा जणांना अटक केली. दिल्ली आणि विशाखापट्टणम सीबीआयच्या टीमने मुंबई सीबीआय अधिकार्‍यांच्या मदतीने ही कारवाई केली.

एस्सार स्टील्स कंपनीकडून लाच घेतल्याचा आरोप
सीबीआयने काल रात्री ही कारवाई केली. एस्सार स्टील्स कंपनीकडून लाच घेतल्याचा आरोप बी व्ही राजेंद्र प्रसाद यांच्यावर आहे. अटक करण्यात आलेल्यांमध्ये आयकर विभागाचे (लवाद) आयुक्त बी.बी. राजेंद्र प्रसाद यांचा समावेश असल्याने मोठी खळबळ उडाली आहे. या सर्वांनी पैसे घेऊन काही कॉर्पोरेट कंपन्यांवर मेहेरनजर केल्याचा आरोप आहे. याबद्दल सीबीआयला माहिती मिळाल्यानंतर या अधिकार्‍यांच्या घरावर छापे टाकण्यात आले. सीबीआयकडून काल रात्री गुप्तपणे ही कारवाई पार पाडण्यात आली. यावेळी सीबीआयने लाच म्हणून देण्यात आलेली तब्बल दीड कोटी रूपयांची रक्कमही जप्त केली.

सगळ्या आरोपींकडून 19 कोटी रुपये जप्त
सीबीआयने मंगळवारी रात्री बीव्ही राजेंद्र प्रसाद यांच्या घरावर आणि कार्यालयावर छापा टाकाला. आतापर्यंतच्या छापेमारीत सगळ्या आरोपींकडून 19 कोटी रुपये जप्त करण्यात आले आहेत. सीबीआयने या प्रकरणात राजेंद्र प्रसाद यांची साथ देणार्‍या प्रदीप मित्तल, (ऑपरेटर, एस्सार ग्रुप), श्रेयस पारीख, (सीए), बा व्ही राजेंद्र, ज्वेलर्स कम हवाला ऑपरेटरलाही अटक केली.