मुंबई इमारत दुर्घटनेतील बळींची संख्या 34; 51 जणांची सुखरुप सुटका!

मुंबई : जुन्या मुंबईतील भेंडी बाजारातील पाकमोडिया स्ट्रीटवरची हुसेनी ही सहा मजली इमारत गुरुवारी सकाळी साडेआठ वाजता कोसळली होती. 117 वर्षांच्या या जीर्ण इमारतीच्या ढिगार्‍याखाली दबून 34 जणांचा मृत्यू झाला असून, त्यात 24 पुरुष, 9 महिला व एका तीन वर्षीय मुलीचा समावेश आहे. बचाव पथकांनी 51 रहिवाशांना ढिगार्‍याखालून सुखरूप बाहेर काढले आहे. बचाव कार्यात अग्निशमन दलाचे 5 व एनडीआरएफचा एक जवान जखमी झाला असून, अग्निशमन दलाचे 125 व अंधेरी येथून एनडीआरएफचे 90 जवान बचाव कार्यात सहभागी झाले होते. सुखरूप सुटकेनंतर बचावकार्य थांबविण्यात आले होते.

राज्य सरकारकडून चौकशीचे आदेश
बहुसंख्य बोहरी समाज वास्तव्याला असलेला हा परिसर दाटीवाटीचा आहे. इमारतीशेजारी मिठाईची अनेक दुकाने होती, त्यामुळे ढिगार्‍याखाली किमान 60 ते 65 लोक अडकले असण्याची भीती वर्तवण्यात येत होती. या सहामजली इमारतीत 10 सदनिका व 6 गोदामे होती. 5 कुटुंबे राहत होती, तर 5 कुटुंबे यापूर्वीच संक्रमण शिबिरात स्थलांतरित झाली होती. मुख्यमंत्री देवेंद्र फडणवीस यांनी अतिरिक्त आयुक्तांमार्फत दुर्घटनेच्या चौकशीचे आदेश दिले असून, सरकारने मृतांच्या वारसांना पाच लाखांची मदत जाहीर केली आहे. फडणवीस यांच्यासह गृहनिर्माण मंत्री प्रकश मेहता, विरोधी पक्षनेते धनंजय मुंडेंनी काल घटनास्थळी भेट दिली होती. महापालिका आयुक्त अजोय मेहता आणि मुंबई शहर जिल्हाधिकारी संपदा मेहता यांनीही घटनास्थळी जाऊन बचावकार्याचा आढावा घेतला.

इशारा टाळून कुटुंबीयांचा निवास?
हुसेनी म्हाडाची उपकर प्राप्त इमारत असून, 2011 मध्ये ती बोहरी धर्मगुरूंच्या पुढाकाराने स्थापन सैफी बुर्‍हानी ट्रस्टकडे पुनर्विकासासाठी दिली होती. म्हाडाने त्यासाठी ना हरकत प्रमाणपत्र दिले होते. रहिवाशांसाठी संक्रमण शिबिरेही उपलब्ध करून दिली होती. तरीसुद्धा 5 कुटुंबे इथेच राहत होती. दरम्यान, इमारती धोकादायक नव्हती, पालिकेने नोटीसही बजावली नव्हती, असे शेजारच्या हारून इमारतीमधील रहिवाशांनी सांगितले.