मुंबई पोलीस आयुक्तपदी परमबीर सिंग यांची नियुक्ती

मुंबई: मुंबई पोलीस आयुक्तपदी परमबीर सिंग यांची नियुक्ती करण्यात आली आहे. संजय बर्वे आज सेवानिवृत्त होत असून त्यांच्याजागी निवड करण्यात आली. शनिवारी सकाळी निवडी बाबतचा आदेश जारी करण्यात आला आहे. त्यामुळे, नव्या आयुक्तांच्या नावाबाबतचा सस्पेन्स दूर झाला आहे.

एसीबीचे महासंचालक परमबीर सिंग, सुरक्षा महामंडळाचे महासंचालक डी.कनकरत्नम आणि अप्पर पोलीस महासंचालक रजनीश सेठ यांची नावे मुंबई पोलीस आयुक्त पदासाठी चर्चेत होती. अखेर परमबीर सिंग यांच्या नावावर शिक्कामोर्तब झाले आहे. परमबीर सिंग हे १९८८ च्या बॅचचे आयपीएस अधिकारी आहेत. सध्या ते, लाचलुचपत प्रतिबंधक विभाग, महाराष्ट्र राज्य मुंबईच्या महासंचालकपदी रूजू होते. आता, मुंबई पोलीस आयुक्तपदी त्यांची बदली झाल्याने, त्यांच्याजागी लाचलुचपत विभागाचे अपर पोलीस महासंचालक बिपीन के. सिंग यांना अतिरिक्त पदभार देण्यात आला आहे.

दरम्यान, मावळते पोलीस आयुक्त संजय बर्वे यांना शनिवारी सकाळी मुंबई पोलीस दलातर्फे भावुक आणि शुभेच्छा देत निरोप देण्यात आला. नायगावच्या मैदानावर पारंपरिक पद्धतीने हा निरोप संमारंभाचा कार्यक्रम पार पडला.