मुक्ताई दर्शनाची लागली आस

मुक्ताईनगर । दरवर्षाप्रमाणे यंदाही महाशिवरात्रीच्या महापर्वावर मुक्ताईनगर तालुक्यातील श्री क्षेत्र मेहूण तापीतीर येथील आदिशक्ती संत मुक्ताई तिर्थक्षेत्राला महाराष्ट्रासह गुजरात व मध्यप्रदेशातील 60 दिंड्या हजारो भाविकांसह दाखल झाल्या. संत मुक्ताईचे गुप्तस्थान मेहूण तापीतीर मुक्ताई भक्तीच्या मळ्याने फुललेले दिसत आहे. ज्ञानोबा माऊली तुकाराम व मुक्ताई शरणम्च्या जयघोषाने मेहूण तिर्थक्षेत्र दुमदूमत आहे. श्रीक्षेत्र मेहूण तापीतीर येथे मंगळवार 21 ते शनिवार 25 फेब्रुवारी दरम्यान महाशिवरात्री महोत्सवास प्रारंभ झाला. महाशिवरात्री महोत्सवासाठी महाराष्ट्रातील कानाकोपर्‍यातून तसेच बाजूच्या राज्यातील दिंड्यांचे आगमन मंगळवार 21 रोजी दुपारी 12 वाजेपासून रात्री 10 वाजेपर्यंत ‘ज्ञानोबा माऊली तुकाराम, मुक्ताई शरणम् मुक्ताई शरणम्, निवृत्ती ज्ञानदेव सोपान मुक्ताई एकनाथ नामदेव तुकाराम’ या जयघोषात, पावल्या टाकत मोठ्या जल्लोषात झाले. तत्पूर्वी या दिंड्या मेहूण-चिंचोल येथे आल्या असता तेथे यज्ञेश्‍वर आश्रमातर्फे हभप शारंगधर महाराज मेहूणकर यांनी त्यांचे स्वागत केले.

दिंडीतील भाविकांनी घेतले आदिशक्ती संत मुक्ताईंचे दर्शन
त्यानंतर चिंचोल ग्रामस्थातर्फे सर्व दिंड्यांमधील हजारो पायी वारकर्‍यांना श्रीराम मंदीरसमोर भोजन देण्यात आले. त्यानंतर या दिंड्या श्रीक्षेत्र मेहूणकडे रवाना झाल्या. या दिंड्यांचे स्वागत श्रीक्षेत्र मेहूण देवस्थानातर्फे हभप लक्ष्मण महाराज यांनी केले. संत आदिशक्ती मुक्ताईंच्या मंदीराला प्रदक्षिणा घालून व तापीमातेचे तिर्थ घेत एकेका दिंडीतील भाविकांनी आदिशक्ती संत मुक्ताईंचे दर्शन घेतले. त्यानंतर दिंड्या नेमून दिलेल्या ठिकाणी विसावल्या.

हजारो भाविक दाखल
आपापल्या गावांहून पायी वारी करत येणार्‍या भाविकांना संत मुक्ताईंचे दर्शन होताच त्यांच्या सर्व परिश्रमाचे चीज झाले व आत्मिक आनंदाची प्राप्ती झाल्याचा अनुभव वारकर्‍यांच्या चेहर्‍यावरून ओसंडून वाहत होता. सायंकाळच्या सुमारास मंदिराला प्रदक्षिणा घालत सर्वच दिंड्यांनी ज्ञानोबा माऊली तुकाराम अशा गजरात आसमंत दणाणून सोडला. दिंडीतील भाविक अभंगाचे गायन, तालावर पावली, हरिपाठ आणि गवळणी व भजने म्हणत महोत्सवाचा आनंद लुटत होते. भागवत एकादशीला संत मुक्ताईंचे दर्शन म्हणजे प्रति विठ्ठलाचे दर्शन मानले जाते. हे दर्शन घडावे यासाठी दशमीच्या दिवशीच हजारो भाविक दिंडीच्या स्वरूपात पोहोचले आहेत.

काल्याच्या कीर्तनाने समारोप
हजारो भाविकांची अलोट गर्दी उलटली असल्याने पोलिसांनी चोख बंदोबस्त ठेवला आहे. हा उत्सव 25 पर्यंत चालणार असून काल्याच्या कीर्तनाने उत्सवाचा समारोप होणार आहे. बुधवार 22 रोजी पहाटे संत मुक्ताईंचा महाभिषेक, महापूजा व महाआरती करण्यात येणार आहे. एकादशीनिमित्त मेहूण-चिंचोल ग्रामस्थांतर्फे फराळाचे वाटप करण्यात येईल. भाविकांनी महाशिवरात्री महोत्सवाचा लाभ घ्यावा, असे आवाहन संत आदिशक्ती मुक्ताई देवस्थान श्रीक्षेत्र मेहूण यांच्या वतीने करण्यात आले आहे.