मुख्यमंत्र्यांची सलग 4 तास बैठक
मुंबई । राज्यातील रेल्वे, रस्ते, मेट्रो अशा विविध प्रकल्पांबाबत मुख्यमंत्री देवेंद्र फडणवीस यांनी आज मंत्रालयात वरिष्ठ अधिकार्यांच्या बरोबर तब्बल सलग चार तास बैठक घेऊन प्रकल्पांना चालना दिली. मंत्रालयातील सातव्या मजल्यावरील वॉर रुममध्ये बुधवारी या प्रकल्पांबाबत आढावा बैठक मुख्यमंत्र्यांनी घेतली. यावेळी रेल्वे, जलसंधारण, समृद्धी कॉरीडॉर, महामेट्रो आदींच्या कामांबाबत सविस्तर आढावा त्यांनी घेतला. भूसंपादन, सर्वेक्षण त्याअनुषंगिक असणार्या समस्या समजावून घेऊन संबंधित अधिकारी, जिल्हाधिकारी यांच्याशी लगेचच व्हिडीओ कॉन्फरन्सद्वारेही संवाद साधून प्रश्नांचे निराकरणही केले. छत्रपती शिवाजी महाराज टर्मिनस ते पनवेल या उन्नत मार्गावर खारघर येथे रेल कार शेड निर्माण करण्यासाठी रेल्वे मंत्र्यांबरोबर बैठक घेण्याचे मुख्यमंत्र्यांनी निश्चित केले.
बैठकीत घेतलेले निर्णय
2011 च्या जनगणनेच्या आधारे रेल्वे मार्गालगत झोपडपट्टी पुनर्वसनाकरिता सर्वेक्षण पूर्ण करावे. सिडको-बेलापूर-सीवूड-उरण मार्गाच्या भूसंपादनासाठी 15 दिवसांत रेल्वेने बैठक घ्यावी. मुंबई सेंट्रल आणि बोरीवली यादरम्यान होणार्या सहापदरी रेल्वे मार्गाबाबत भूसंपादनाचे काम लवकर मार्गी लावणे.
या योजनांचा घेतला आढावा
पुणे मेट्रोअंतर्गत सहा महिन्यांत स्वारगेट, पुणे येथील एकत्रित परिवहन हब मार्गी लावणे. यवतमाळ जिल्ह्यातील बेंबला प्रकल्पासाठी 150 कोटी आणि लघु वर्धा प्रकल्पासाठी 150 कोटी देण्यात आले आहेत. पुनर्वसनाच्या कामांना गतिमान करणे. वांग मराठवाडी प्रकल्पाच्या पुनर्वसनाबाबतही त्यांनी यावेळी चर्चा केली. गोरेगाव-मुलुंड जोडमार्ग प्रकल्प, कोस्टल मार्ग (दक्षिण), पुणे मेट्रो, नागपूर मेट्रो, हायब्रीड न्युटी मॉडेल आदींबाबतही त्यांनी यावेळी आढावा घेतला.
यांची होती उपस्थिती
या बैठकीस मुख्य सचिव सुमित मल्लिक, मुख्यमंत्र्यांचे अपर मुख्य सचिव प्रवीण परदेशी, बृहन्मुंबई महापालिका आयुक्त अजोय मेहता, नगरविकास विभागाचे प्रधान सचिव नितिन करीर, जलसंपदा विभागाचे प्रधान सचिव आय.एस. चहल, सिडकोचे व्यवस्थापकीय संचालक भूषण गगराणी, मुख्यमंत्र्यांचे सचिव प्रवीण दराडे, माहिती व जनसंपर्क सचिव तथा महासंचालक ब्रिजेश सिंह, बृहन्मुंबई महापालिका अतिरिक्त आयुक्त संजय मुखर्जी आदींसह रेल्वेचे वरिष्ठ अधिकारी उपस्थित होते.