मुख्य लेखापरीक्षक बनसोडे पुन्हा मनपात

मुंबई । मुंबई महापालिकेचे मुख्य लेखापरीक्षक सुरेश बनसोडे यांच्यावर भाजपाने केलेल्या गंभीर आरोपानंतर महापालिका आयुक्त अजोय मेहता यांनी राज्य सरकारकडे पाठवण्याचा निर्णय घेतला. मात्र न्यायालयाने बनसोडे यांना महापालिकेत पुन्हा रुजू करून घेण्याचे आदेश दिल्यानंतर आता बनसोडे यांची पुन्हा महापालिकेत नेमणूक करण्यात आली आहे. बनसोडे यांची पुन्हा त्याच पदावर नेमणूक करावी लागल्याने हा पालिका आयुक्त व भाजपाला जबरदस्त धक्का असल्याची चर्चा सध्या पालिका मुख्यालयात आहे.

बनसोडेंची सरकारकडे झालेली बदली
महापालिकेतील मुख्य लेखापरीक्षक या पदावर कार्यरत असलेले सुरेश बनसोडेंच्या सांगण्यावरून वरळी हब येथील कार्यालयात कुलाबा सांडपाणी प्रकल्पाच्या कंत्राटाची कागदपत्रे कंत्राटदारांच्या दोन प्रतिनिधींना दाखवण्यात आली. या दोघांनी या कागदपत्रांचे मोबाईलमध्ये फोटो काढले. पालिकेत पुढे येणार्‍या टेंडरसाठी याचा वापर केला जाणार असल्याचा आरोप भाजपाचे गटनेते मनोज कोटक यांनी केला होता. कोटक यांनी आयुक्तांकडे याबाबत तक्रारही केली होती. या तक्रारीनंतर बनसोडे यांना ताबडतोब सरकारकडे परत पाठवले होते.