मुलीला जन्म देवून मातेने घेतला जगाचा निरोप

प्रसूतीनंतर मृत्यू ; बाळावर खाजगी रुग्णालयात उपचार सुरु

जळगाव- शहरातील शिवाजीनगर येथील योगिता किसन गाडे वय 20 या विवाहितेचा उपचारादरम्यान शनिवारी रात्री 10.30 वाजेच्या सुमारास जिल्हा रुग्णालयात मृत्यू झाल्याची घटना घडली. दरम्यान तीन दिवसांपूर्वी योगिताची प्रूसती होवून तिने मुलीला जन्म दिला आहे, बाळाचीही प्रकृती गंभीर असून त्याच्यावरही खाजगी रुग्णालयात उपचार सुरु आहेत.

मुलीला जन्म दिल्यावर तीन दिवसांनी मातेचा मृत्यू
शिवाजीनगर परिसरात किसन विष्णू गाडे हे पत्नी योगिता, भाऊ विष्णू, वडील विष्णू भानुदास गाडे व आई इंदुबाई याच्यासोबत वास्तव्यास आहे. चार वर्षापूर्वी त्यांचा योगीता हिच्या सोबत विवाह झाला. योगीता आठ महिन्याची गरोदर असल्याने तिची प्रकृती बिघडली. तिला गुरुवारी सहयोग क्रिटीकल केअरला येथे हलविण्यात आले. याठिकाणी मुलीला जन्म दिला. योगीतावर उपचार सुरु होते. शनिवारी दुपारी प्रकृती अधिकच खालावल्याने तिला जिल्हा रुग्णालयात हलविण्यात आले. याठिकाणी रात्री 10.30 वाजेदरम्यान तिची अखेर मृत्यूशी सुरु असलेली झुंज अपयशी ठरली. व तिची प्राणज्योत मालवली.

कुटुंबियांचा आक्रोश
तिच्या बाळावरही खाजगी रुग्णालयात उपचार सुरु आहे, असे नातेवाईकांनी सांगितले. दरम्यान माहिती मिळताच नातेवाईकांनी जिल्हा रुग्णालयात गर्दी केली. याठिकाणी पती किसन याच्यासह कुटुंबियांनी एकच आक्रोश केला. शहर पोलीस ठाण्यात पोलीस उपनिरिक्षक जगदीश मोरे यांच्यासह कर्मचार्‍यांनी पंचनामा केला. यानतंर करुन शवविच्छेदनानंतर मृतदेह नातेवाईकांच्या ताब्यात देण्यात आला. याप्रकरणी शहर पोलिसात अकस्मात मृत्यूची नोंद करण्यात आली आहे.