मूडीजवर टीका करताना क्रिकेटपटू टॉम मूडी ट्रोल

नवी दिल्ली । आंतरराष्ट्रीय क्रेडिट रेटिंग एजन्सी मूडीजने भारतीय अर्थव्यवस्थेचे केलेले कौतुक विरोधकांना रुचले नाही. त्यामुळे मूडीजवर टीका करण्याच्या नादात हे ट्रोलर्स तोंडघशी पडले आहेत. मूडीज ऐवजी अनेकांनी चक्क माजी क्रिकेटपटू टॉम मूडी यांच्यावर तोंडसुख घेतले. मूडीजने नुकतेच भारतीय अर्थव्यवस्थेचे तोंडभर कौतुक केले. यावेळी मोदी सरकारने सुधारणांचे श्रेय घेतले. काही विरोधकांना मोदी सरकारने घेतलेलं श्रेय आवडले नाही. त्यामुळे त्यांनी टीका करण्यासाठी मूडी एजन्सीच्या फेसबुक पेजचा शोध घ्यायला सुरुवात केली. मूडीजचं पेज शोधता शोधता विरोधकांना माजी ऑस्ट्रेलियन क्रिकेटपटू आणि आयपीएलमधील टीम सनरायझर्स हैदराबादचे प्रशिक्षक टॉम मूडी यांचे पेज सापडलं. त्यामुळे ट्रोलर्सनी चुकून त्यांच्यावरच टीकेचा भडीमार केला. भारतीय अर्थव्यवस्थेला असे रेटिंग दिल्याबद्दल तुम्हाला लाज वाटली पाहिजे, असे थेट टॉम मूडी यांनाच सुनावले.

टीकाकारांमध्ये माकपच्या कार्यकर्त्यांचा समावेश होता. बर्‍याचशा कमेंट्स या मल्ल्याळम आणि इंग्रजी भाषेत होत्या. अखेर काही वेळाने कार्यकर्त्यांना आपली चूक उमगली आणि त्यांनी टॉम मूडी यांची माफीही मागितली. आर्थिक आणि संस्थात्मक सुधारणांमुळे वृद्धीची शक्यता वाढल्याने रेटिंगमध्ये सुधारणा झाल्याचे मूडीजने सांगितले. महत्त्वाचे म्हणजे मूडीजने भारताचे रेटिंग 13 वर्षांनी अपग्रेड केले आहे. याआधी 2004 मध्ये भारताचं रेटिंग वाढवून बा3 केलं होतं. तर 2015 मध्ये रेंटिंग स्थिरवरुन (स्टेबल) सकारात्मक (पॉझिटिव्ह) श्रेणीत ठेवले होते. एखाद्या देशाच्या सरकारने घेतलेल्या निर्णयांचा अर्थव्यवस्थेवर कसा परिणाम होतो, त्यावर मूडीजचं रेटिंग ठरतं. मोदी सरकारने मागील काही काळात अशा प्रकारचे निर्णय घेतले आहेत, असं मूडीजने म्हटलं आहे.