‘मूर्ती आमची, किंमत तुमची’ उपक्रम

न्यू इंग्लिश स्कूलमध्ये गणेशमूर्तींचे प्रदर्शन आणि विक्री

पुणे – डेक्कन एज्युकेशन सोसायटीच्या न्यू इंग्लिश स्कूल शाळेतील विद्यार्थ्यांनी ‘मूर्ती आमची, किंमत तुमची’ या अभिनव उपक्रमाचे आयोजन केले आहे. याअंतर्गत विद्यार्थ्यांनी तयार केलेल्या पर्यावरणपूरक गणेशमूर्तींचे प्रदर्शन आणि विक्री शाळेच्या आवारात करण्यात येणार आहे.

शाडू मातीपासून गणेश मूर्ती बनविण्याचा उपक्रम शाळेत गेल्या 15 वर्षांपासून सुरू आहे. यावर्षी एसएनडीटी महाविद्यालयातील कलाशिक्षक श्रीकांत पांचाळ यांनी विद्यार्थ्यांना मूर्ती बनविण्याचे प्रशिक्षण दिले. हत्ती गणपती, परशुरामाशी युद्ध करणारा गणपती, बाहुबली, महाभारत लिहिणारा गणपती, पर्यावरणाचा संदेश देणारा गणपती अशा विविध प्रकारच्या मुर्त्या विद्यार्थ्यांनी साकारल्या आहेत. एसएनडीटी महाविद्यालयाच्या कला विभागाच्या प्रमुख राजेश्री कुलकर्णी यांनी परीक्षण केले. मुख्याध्यापक नागेश मोने यांच्या मार्गदर्शनाखाली कला शिक्षक सुरेश वरंगटीवार, हनुमंत तोडकर यांनी उपक्रम यशस्वी करण्यासाठी विशेष प्रयत्न केले.