मेट्रोला कर्जासाठी चीनी बँकेकडे साकडे!

मुंबई : राज्यात होऊ घातलेल्या विकास प्रकल्पांच्या विकासासाठी राज्य सरकार विदेशी बँकांकडे साकडे घालताना दिसून येत आहे. यामध्ये आता चीनची भर पडली असून एमएमआरडीएच्यावतीने बँकेकडे मेट्रोच्या नियोजीत मेट्रो ८, १०, ११ तसेच १२ या प्रकल्पांसाठीच्या सुमारे अकरा हजार कोटी रुपयांच्या विकास कर्जाचा प्रस्ताव चीनमधील न्यू डेव्हलपमेंट बँकेकडे देण्यात आला.

मुंबईतील मेट्रो प्रकल्पाच्या विकासाठी चीनमधील न्यू डेव्हलपमेंट बँकेकडून १ हजार ५६२ कोटी रुपयांचे कर्ज देण्यास मान्यता देण्यात आल्याची माहिती बँकेचे उपाध्यक्ष तथा चीफ ऑपरेटींग ऑफिसर झीआन हू यांनी मुख्यमंत्री देवेंद्र फडणवीस यांना दिली. बँकेच्या शिष्टमंडळाने मंगळवारी मुख्यमंत्री फडणवीस यांची वर्षा निवासस्थानी भेट घेतली.

या विकास कर्जाचा विनीयोग मुंबईतील मेट्रोच्या २ए, २ बी आणि मेट्रो ७ या प्रकल्पांसाठी करण्यात येणार आहे. यावेळी  अकरा हजार कोटी रुपयांच्या विकास कर्जाचा प्रस्ताव चीनमधील न्यू डेव्हलपमेंट बँकेकडे देण्यात आला. बँकेकडून मंजूर केलेल्या या विकास कर्जातून मेट्रोच्या २ए, २ बी आणि मेट्रो ७ या प्रकल्पांतील मेट्रोच्या कार्यान्वयनासाठीचा वीज पुरवठा, विद्युतीकरण, उदवाहन अशा विविध सुविधा विकसित केल्या जाणार आहेत.

मुख्यमंत्री फडणवीस यांनी न्यू डेव्हलपमेंट बँकेचे हे सहकार्य मुंबईतील मेट्रो आणि महत्त्वाकांक्षी अशा प्रवाशी सुविधा क्षेत्राच्या विकासात महत्त्वपुर्ण ठरेल तसेच यामुळे मुंबई शहरातील मेट्रोच्या विविध विकास प्रकल्पांना अपेक्षीत गती मिळेल, असा विश्वासही व्यक्त केला.