मेट्रोसाठीच्या वृक्षतोडीवर स्थगिती

मुंबई । कोणताही सारासार विचार न करता अधिकारी वृक्ष तोडण्यासाठी परवानगी देतातच कसे? लोकांना विश्‍वासात न घेता वृक्ष तोडण्यासाठी परवानगी कशी दिली जाते? अशी प्रश्‍नांची सरबत्ती यानिमित्ताने मुंबई उच्च न्यायालयाने मुंबई महापालिकेवर केली. एखाद्या ठिकाणी वृक्षतोड होत असल्यास त्याची जाहिरात महत्त्वाच्या वृत्तपत्रांमध्ये का दिली नाही? अशी विचारणा करत न्यायालयाने मुंबईत सुरु असलेल्या मेट्रो प्रकल्पाच्या कामासाठी सुरु असलेल्या वृक्षतोडीवर मुंबई उच्च न्यायालयाने स्थगिती दिली. एखादे झाड तोडले जाणार असेल तर ते लोकांना का कळू दिले जात नाही? असा प्रश्‍न विचारुन, हा प्रकार सहन केला जाणार नसल्याचे हायकोर्टाने ठासून सांगितले. एखाद्या विभागातील 25 पेक्षा कमी झाडे तोडायची असतील तर महापालिका आयुक्तांची परवानगी घेतली जाते. त्यापेक्षा अधिक वृक्षसंख्या असेल, तर वृक्ष प्राधिकरणाकडे ते प्रकरण जाते. जानेवारीत 25 पेक्षा कमी वृक्षांचेे 49 प्रस्ताव आयुक्तांकडे आले.

मनपा आयुक्तांकडे अशा प्रस्तावांवर विचार करण्यासाठी वेळही नाही आणि तसे तज्ज्ञही नसल्याने फारशी शहानिशा न करताच वृक्षतोड परवानगी दिली जात असल्याची याचिका सामाजिक कार्यकर्ता झोरु भाटेना यांनी हायकोर्टात दिली आहे. केवळ मेट्रो नव्हे, तर एसआरए किंवा अन्य प्रकल्पांच्या अंमलबजावणीवेळी असाच प्रकार होत असल्याचे भाटेना यांनी आपल्या याचिकेत म्हटले आहे. दरम्यान, मुंबई मेट्रो-3च्या कामात झाडे तोडण्याला सेव्ह ट्री आणि सेव्ह आरे या संघटनेने विरोध केला आहे. मेट्रो-3 सह अन्य मेट्रोच्या कामासाठी मुंबईच्या रस्त्यांवरची झाडे कापली जात आहेत, पण त्याचवेळी मेट्रो-3 च्या कारडेपोसाठी चक्क आरेवर कुर्‍हाड चालवली जात आहे. आता मेट्रो जुहू बीचच्याही मुळावर उठल्याचा आरोप सेव्ह ट्री आणि सेव्ह आरेने केला आहे.

जुहू बीचवरही वृक्षतोड
मेट्रो-2 बच्या कामासाठी जुहू कोळीवाडा बीच येथील झाडांची कत्तल करून बीचवर बांधकाम केले जात असल्याची माहिती सेव्ह ट्रीचे सदस्य झोरू बाथेना यांनी दिली आहे. हे संपूर्ण बांधकाम विनापरवानगी बेकायदेशीररीत्या सुरू असल्याचाही आरोप बाथेना यांनी केला असून यासंबंधी लवकरच पोलीस तक्रार दाखल करणार असल्याचे त्यांनी स्पष्ट केले आहे. डी. एन. नगर, अंधेरी ते मानखुर्द या मेट्रो-2 ब च्या कामासाठी जुहु कोळीवाडा बीच येथे मुंबई महानगर प्रदेश विकास प्राधिकरणा (एमएमआरडीए)कडून कास्टिंग यार्ड बांधण्यात येणार आहे. या कास्टिंग यार्डमध्ये मेट्रोचे खांब, गर्डर आणि इतर भाग तयार केले जाणार आहेत.

आरेनंतर बीचवरूनही वाद रंगणार
आरे जंगल वाचवण्यासाठी सेव्ह ट्री आणि सेव्ह आरे प्रयत्नशील असून त्यांनी यासाठी जनआंदोलन सुरू केले आहे. त्यात आता बीचवरही एमएमआरडीएची वक्रदृष्टी असल्याने आता बीचवरूनही पर्यावरणवादी विरूद्ध एमएमआरडीए वाद रंगण्याची शक्यता आहे.

झाडे तोडून वाळूचाही होतेय उपसा
सुमारे 10 एकर जागेवर हे कास्टिंग यार्ड उभारण्यात येणार असून या कामाला पंधरा दिवसांपूर्वीच सुरुवात झाली आहे. त्यासाठी बीचवरील 10 फुटांपर्यंतच्या झाडांची, तिवरांची बेसुमार कत्तल करत ती जाळली जात असल्याची माहिती बाथेना यांनी दिली. या कामासाठी अद्यापपर्यंत एमएमआरडीएकडे कोणतीही परवानगी नसल्याने विशेषतः झाड तोडण्याचे काम बेकायदेशीर असल्याचा दावा सेव्ह ट्रीकडून केला.