मेट्रो निगडीपर्यंत आणावी यासाठी पिंपरीत उपोषण

पिंपरी-चिचंवड सिटीझन फोरमच्या नेतृत्वाखाली दोन वर्षांपासून मागणी

पिंपरी-चिंचवड : पुणे मेट्रो पहिल्याच टप्यात निगडीपर्यंत नेण्याच्या मागणीकडे सरकारचे लक्ष वेधण्यासाठी रविवारी (दि.11) लोकशाही मार्गाने लाक्षणिक उपोषण करण्यात आले. या उपोषणात शहरातील विविध सामाजिक संघटनांसह विविध राजकीय पक्षांच्या पदाधिकारी व कार्यकर्त्यांनी सहभाग नोंदवला. पिंपरीतील डॉ. बाबासाहेब आंबेडकर पुतळा चौकात झालेल्या लाक्षणिक उपोषणामध्ये पिंपरी-चिंचवड सिटीझन फोरम (पीसीसीएफ), पोलीस नागरिक मित्र महाराष्ट्र राज्य, ग्राहक पंचायत पिंपरी-चिंचवड, जलदिंडी प्रतिष्ठान पुणे, आस्था सोशल फाउंडेशन, भावसार व्हिजन ’इ’ पिंपरी-चिंचवड, रोटरी क्लब ऑफ वाल्हेकरवाडी, स्वातंत्र्य वीर सावरकर मंडळ, एसबीआय पेन्शनर असोसिएशन, माउली ज्येष्ठ नागरिक संघ आकुर्डी, फेडरेशन ऑफ घरकुल, सस्कार प्रतिष्ठान पुणे, कै. तुकाराम तनपुरे प्रतिष्ठान आदी संघटनांनी सहभाग घेतला.

खासदार बारणे, आमदार लांडगे यांचा सहभाग
लाक्षणिक उपोषणावेळी मावळ मतदार संघाचे शिवसेनेचे खासदार श्रीरंग बारणे, भोसरी विधानसभा मतदार संघाचे आमदार महेश लांडगे, पिंपरी-चिंचवड महापालिकेचे सभागृह नेता एकनाथ पवार, उपमहापौर शेजला मोरे, नगरसेवक अमित गावडे, शिवसेनेचे पालिकेतील गटनेते राहुल कलाटे, राष्ट्रवादीचे नेते नगरसेवक विठ्ठल उर्फ नाना काटे, नगरसेवक सचिन चिंचवडे, नगरसेवक राजू मिसाळ, नगरसेवक उत्तम केंदळे, नगरसेवक सचिन चिखले, राष्ट्रवादीचे शहराध्यक्ष संजोग वाघेरे, शिवसेना पिंपरी-चिंचवड शहरप्रमुख योगेश बाबर, राष्ट्रवादी युवक काँग्रेसचे प्रदेश संघटक विशाल काळभोर, माजी नगरसेविका सुलभा उबाळे, माजी नगरसेवक राजाभाऊ गोलांडे, माजी नगरसेवक गजानन चिंचवडे, सामाजिक कार्यकर्ते मारुती भापकर, संजय लंके, अमोल भोईटे, सामाजिक कार्यकर्ते गुलाबराव सोनवणे, आदींनी उपोषणाला उपस्थित राहून पाठिंबा दर्शविला.

मिस्ड कॉल मोहिमेस प्रतिसाद
पुणे मेट्रो पहिल्या टप्प्यात निगडीपर्यंत नेण्यासाठी पिंपरी-चिंचवड सिटीझन फोरम (पीसीसीएफ) व अन्य संघटनांच्या वतीने मागील दोन वर्षांपेक्षा अधिक कालावधीपासून विविध स्तरावर प्रयत्न करण्यात येत आहे. केंद्र सरकारने यासाठी तत्वतः मंजुरी दिली असली तरी देखील इतर सर्व स्तरांवरून या मागणीबाबत टाळाटाळ करण्यात येत आहे. मेट्रो निगडीपर्यंत नेण्याच्या मागणीसाठी सुरु करण्यात आलेल्या ’पीसीसीएफ’च्या मिस्ड कॉल मोहिमेस शहरातून प्रचंड प्रतिसाद मिळत आहे.

सर्वांच्या स्वाक्षरीचे पत्र मुख्यमंत्र्यांना
लाक्षणिक उपोषणावेळी उपस्थित नागरिकांनी पुणे मेट्रो निगडीपर्यंत पहिल्या टप्प्यात व्हावी. त्यासाठी राज्यस्तरावर सक्रिय प्रयत्न करावेत. तसेच पिंपरी ते निगडी पर्यंत मेट्रोची गरज काय? याबाबत मुख्यमंत्र्यांना पत्र पाठवण्यात आले. मेट्रो प्रकल्प नागरिकांसाठी फायद्याचा आणि पर्यावरणपूरक आहे. तसेच वेळेची बचत करणारा असल्याने पुणे मेट्रो पहिल्या टप्प्यात निगडीपर्यंत न्यावी, अशी मागणी पत्रात करण्यात आली आहे.

महापालिकेने पिंपरी ते निगडी या मेट्रो मार्गाचा डीपीआर तयार करण्याच्या सूचना दिल्या असून लवकरच डीपीआरचे काम पूर्ण होईल. त्यानंतर लगेच विविध स्तरांवर चर्चा व मंजुरी घेऊन पहिल्याच टप्प्यात मेट्रो निगडीपर्यंत जाईल. महापालिकेला निधीची कमतरता नसून जो निधी वाट्याला येईल तो भरण्यास महापालिका तयार आहे.
– एकनाथ पवार, सभागृह नेता