मेदड कोतवाल भरती प्रकरणाचे गांभीर्य वाढले

बारामती । मेडद (ता. बारामती) येथील कोतवाल भरती प्रकरणातील आणखी काही महत्त्वाची कागदपत्रे हाती लागलेली आहेत त्यामुळे या प्रकरणाचे गांभीर्य आणखीनच वाढले आहे. मेडद ग्रामपंचायतीच्या सरपंच यांनी 22 मार्च रोजी काजल हिवरकर यांना लेखी पत्र देवून सांगण्यात आले की, अक्षदा शैलेश नेवसे यांचे रहिवासी असले बाबतची आपण केलेल्या मागणीच्या कागदपत्रानुसार उपलब्ध ग्रामपंचायत कागदपत्रांची पाहणी केली असता अक्षदा नेवसे यांची मेडद येथील रहिवासी असल्या बाबतची कोणतीही नोंद ग्रामपंचायत दप्तरी आढळून आलेले नाही. असे स्पष्ट करण्यात आलेेले आहे.

मेडद येथे अक्षदा नेवसे यांचे रेशनकार्ड जुने व नवीन तसेच मतदार यादीतील नाव व नंबर उपलब्ध नाही. आधार कार्ड मेडद येथील साक्षांकित प्रत तसेच घरपट्टी व पाणीपट्टी यांच्या मिळकतीचा नोंदवहीचा उतारा त्याची कर भरलेली साक्षांकित प्रत उपलब्ध नाही. युनिट रजिस्टर मेडद येथे असल्यास तसेच मेडद येथे घर असल्याबाबतचा घराचा उतारा उपलब्ध नाही. असे सरपंच डॉ. उज्ज्वला गावडे व उपसरपंच अमोल सावंत यांच्या लेटरपॅडवर लेखी स्वरूपात दिलेली आहे.

भाडेकरू असल्या बाबतचे खोटे प्रतिज्ञापत्र
मेडद ग्रामपंचायतीच्या ग्रामसेवकांनी दिलेल्या पत्रात स्पष्ट केले आहे की, संतोष तुळशीराम गावडे यांच्या नावे असलेल्या ग्रामपंचायत मिळकतीची माहिती सदर व्यक्तिच्या नावे ग्रामपंचायतमध्ये नमुना नं.8 ची पाहणी केली असता मिळकत आढळून आली नाही. तसेच सदर व्यक्तिने कोणालाही भाडेकरू म्हणून घर भाड्याने दिल्याची नोंद ग्रामपंचायतमध्ये आढळून आलेली नाही तरीसुध्दा शैलेशा नेवसे व संतोष गावडे यांनी 100 रूपयेच्या स्टॅम्पवर प्रतिज्ञापत्र तयार करून नेवसे हे माझ्याकडे भाडेकरू म्हणून रहात आहेत. असे प्रतिज्ञापत्र दिलेले आहे त्यामुळे तहसिलदार यांनी कारवाई करणे गरजेचे आहे. तरीसुध्दा संबंधितांना पाठीशी घालण्याचा प्रकार दिसून येत आहे.

नेमनुकीसाठी बनावट कागदपत्रे
या प्रकरणात सरळ सरळ सर्वच कागदपत्रे बनावट असूनदेखील नेमणूक दिलीच कशी हा गंभीर प्रश्‍न तयार झाला आहे. दरम्यान बारामतीचे तहसिलदार हनुमंत पाटील यांनी याबाबत बोलताना सांगितले की, या प्रकरणी संबंधितास जिल्हाधिकारी यांच्याकडे दाद मागता येईल. मी याबाबत निर्णय घेतला असल्याकारणाने मला याबाबत काही करता येत नाही.