मेरे कर्म, स्वभाव मुझे जीने नही देंगे, चिठ्ठी लिहून प्रौढाचा गळफास
जळगाव- ‘मेरा कर्म और स्वभाव मुझे जीने नही देगा और तकलीफे बढायेगा, अशा आशयाची हिंदी भाषेत चिठ्ठी लिहून जीवनाला कंटाळलेल्या प्रमोद लालचंद दायमा (वय 50 रा. भिलपुरा चौकीजवळ, शनीपेठ ) यांनी राहत्या घरात गळफास घेतल्याची घटना गुरुवारी सायंकाळी 4.30 वाजेच्या सुमारास घडली. मयत दायमा हे महापालिकेचे नगरसेवक विशाल त्रिपाठी यांचे ते मेव्हणे आहेत.
शहरातील भिलपुरा चौकीजवळ प्रमोद दायमा हे पत्नी राजश्री सोबत वास्तव्यास होते. मुलगा कृष्णा हा मेकॅनिकल इंजिनिअर असून तो पुण्याला नोकरी करतो. तर मुलगी राजश्री ही विवाहित आहे. प्रमोद दायमा हे त्यांचे नातेवाईक डॉ. ओमप्रकाश त्रिपाठी यांच्या आयुर्वेदीक दवाखान्यात ते औषधी बनवायचे काम करत असे. तर त्यांची पत्नी राजश्री मेहंदी आर्टिस्ट आहे. ऑर्डर मिळेल त्यानुसार त्या मेहंदी काढून देण्याचे काम करतात.
मोलकरणीमुळे प्रकार उघड
राजश्री ह्या गुरुवारी दुपारी ऑर्डरनुसार मेहंदी काढावयास गेल्या होत्या. प्रमोद हे घरी एकटेच होते. यादरम्यान त्यांनी छताला दोरीने गळफास घेवून आत्महत्या केली. सायंकाळी 4.30 वाजेच्या सुमारास नेहमीप्रमाणे घर कामावर असलेली मोलकरीण आली, दरवाजा लोटला असता, तिला प्रमोद दायमा गळफास घेतलेल्या अवस्थेत मिळून आले. त्यांनी तत्काळ ते काम करत असलेल्या डॉ. त्रिपाठी यांच्या रुग्णालयाकडे धाव घेतली. डॉ. ओमप्रकाश त्रिपाठी यांच्यासह दायमा यांचे शालक मनपाचे नगरसेवक विशाल त्रिपाठी यांनी घटनास्थळाकडे धाव घेतली. पोलिसांनी माहिती कळविली. त्यानुसार मृतदेह खाली उतरवून जिल्हा रुग्णालयात हलविण्यात आला. राजश्री दायमा यांचा मन हेलावणारा आक्रोश होता. माहिती मिळाल्यानंतर नातेवाईकांनी जिल्हा रुग्णालयात गर्दी केली होती.
अशी आहे मृत्युपूर्व चिठ्ठी
प्रमोद दायमा यांनी मृत्युपूर्वी लिहलेली हिंदी भाषेतील चिठ्ठी आढळून आली आहे. यात त्यांनी मै प्रमोद दायमा फाशी ले रहा हु, इस का दोषी खुद हू, क्योकी मेरा कर्म या स्वभाव मुझे जीने नही देगा, और तकलीफे बढायगा, सभी बडे और छोटे मुझे माफ करना…असे म्हटले आहे. शनिपेठ पोलिसांनी ही चिठ्ठी जप्त केली आहे. याप्रकरणी शनिपेठ पोलिसात अकस्मात मृत्यची नोंद करण्यात आली आहे.