मैदानासाठी मनसे पुन्हा शिवसेनेच्या दारी

मुंबई । महापालिकेत मनसेने शिवसेनेबरोबर युती करण्यासाठी हात पुढे केला होता. युती तर झाली नाही मात्र पुन्हा मनसेने शिवसेनेकडे आणखी एक विनंती केली आहे. उद्या मनसेची शेवटची प्रचारसभा दादरमधील दत्ता राऊळ मैदानावर करू द्यावी, अशी विनंती केली आहे.मनसे नेते बाळा नांदगावकर यांनी शिवसेना नेते सदा सरवणकर यांना विनंती केली.शिवसेनेने दत्ता राऊळ मैदान बूक केल्यामुळे मनसेला 18 रोजीची सभा दादरमधील कबुतरखान्याजवळ घ्यावी लागणार आहे. मात्र त्याऐवजी राऊळ मैदान मिळावे, अशी मनसेची विनंती आहे.दादरमधील दत्ता राऊळ मैदान हे शिवसेनेने आधीच बूक केले आहे.

मात्र शिवसेना पक्षप्रमुख उद्धव ठाकरे यांची उद्याची शेवटची सभा बीकेसीमधल्या एमएमआरडीए मैदानावर आहे. मग असे असताना शिवसेनेला दोन्ही मैदाने कशासाठी असा सवाल करत, मनसे नेते संदीप देशपांडे यांनी शिवसेनेवर आक्षेप घेतला होता. मनसे अध्यक्ष राज ठाकरे यांची सभा होऊ नये, यासाठी शिवसेनेने दादरमधलं दत्ता राऊळ मैदान अडवून ठेवल्याचा आरोप मनसेचे प्रवक्ते संदीप देशपांडे यांनी केला.

शिवसेनेचा दावा

मात्र शिवसेनेने हे मैदान दोन-चार दिवसात नव्हे तर खूप आधीच बूक केले आहे. त्यामुळे कधीही झोपेतून उठून मैदान मागणार्‍यांना का देऊ, अशी भूमिका शिवसेनेचे उमेदवार समाधान सरवणकर यांनी घेतली.तसेच उद्धव ठाकरेंची सभा बीकेसी मैदानावर असली, तरी दत्ता राऊळ मैदानावर शिवसेनेचे इतर नेते सभा घेणार असून, ते मैदान आपण आधीच आरक्षित केल्याचा दावा शिवसेनेने केला आहे.