मोदींचे अच्छे दिन.. तीन वर्षानंतरही देशातील सर्वात लोकप्रिय नेते

अमेरिकन सर्व्हे एजन्सी प्यू रिसर्च सेंटरने केले हे सर्वेक्षण

नवी दिल्ली : गुजरात विधानसभा निवडणुकीदरम्यान भाजपसाठी एक चांगली बातमी आहे. भारतीय राजकारणात पंतप्रधान नरेंद्र मोदी आजही सर्वात लोकप्रिय नेते आहे. नोटाबंदी, जीएसटीच्या निर्णयामुळे पंतप्रधान नरेंद्र मोदी आणि भाजप सरकारविषयी जनतेच्या मनात राग असल्याचे बोलले जात असले तरी तीन वर्षांनंतरही मोदींची लोकप्रियता आणि त्यांच्यावरील विश्वास कमी झालेला नाही. असे मत अमेरिकन सर्व्हे एजन्सी प्यू रिसर्च सेंटरने केलेल्या सर्वेक्षणात नोंदविले आहे. याशिवाय देशाच्या आर्थिक स्थितीबाबतही लोक समाधानी आहेत.

कधी झाला सर्व्हे?
21 फेब्रुवारी ते 10 मार्च म्हणजेच उत्तर प्रदेश निवडणुकांच्या काळात हे सर्व्हेक्षण करण्यात आलं आहे. या सर्व्हेमध्ये देशातल्या 2464 लोकांना प्रश्न विचारण्यात आले होते. सर्व्हेबाबत प्यू एजन्सीच्या मते, ङ्गभारतीय अर्थव्यवस्थेवर नागरिकांचा विश्वास वाढला आहे आणि लोक बदलांचं सकारात्मकरित्या स्वागत करत आहेत. यावरुन मोदींची लोकप्रियता कायम असल्याचं दिसतं.फ

सर्व्हेत अर्थव्यवस्था मजबूत असल्याचा दावा
सर्व्हेमध्ये 10 पैकी 8 जणांनी मान्य केलं की, भारतीय अर्थव्यवस्थेची स्थिती अद्याप चांगली आहे. सर्वेक्षणात 30 टक्के प्रौढांनी भारतीय अर्थव्यवस्था मजबूत असल्याचं म्हटलं आहे. मोदी ज्या दिशेने देशाला घेऊन पुढे जात आहेत ते पाहता 10 पैकी 7 लोक त्यावर समाधानी आहेत, असं प्यूच्या सर्व्हेमधून समोर आलं आहे.

राज्यातील लोकांचं मत काय?
या सर्वेक्षणानुसार, दक्षिण भारताच्या आंध्र प्रदेश, तामिळनाडू, तेलंगणा तर पश्चिम भारताच्या महाराष्ट्र, छत्तीसगड आणि गुजरातमधील 10 पैकी 9 लोकांनी पंतप्रधान नरेंद्र मोदींवर विश्वास दाखवला आहे.

लोकांचा असा दाखविला टक्केवारीचा विश्वास
नरेंद्र मोदीं 88 टक्के
सोनिया गांधी 57 टक्के
राहुल गांधी 58 टक्के
अरविंद केजरीवाल 39 टक्के