मोदींच्या दौऱ्याच्या पार्श्वभूमीवर धनगर समाजाचे कार्यकर्ते पोलिसांच्या ताब्यात

सोलापूर-पंतप्रधान नरेंद्र मोदी आज सोलापूर दौऱ्यावर आहेत. दरम्यान राज्यात धनगर समाज आरक्षणासाठी आक्रमक झाल्याचे पाहायला मिळत आहे. त्याच पार्श्वभूमीवर सोलापूरमध्ये धनगर समाजाचे नेते, कार्यकर्ते यांना पोलिसांनी ताब्यात घेतले आहे. सुमारे १०० कार्यकर्ते आणि पदाधिकाऱ्यांना पोलिसांनी ताब्यात घेतले आहे.

पंतप्रधान नरेंद्र मोदी हे बुधवारी सोलापुरात येऊन विविध शासकीय योजनांच्या कामांचे भूमिपूजन, पायाभरणी व लोकार्पण करणार आहेत. या निमित्ताने इंदिरा गांधी पार्क स्टेडियमवर त्यांची जाहीर सभा होणार आहे.

मोदी यांच्या सभेवर सोलापूर जिल्ह्यातील धनगर समाजाने बहिष्कार घातला आहे. पंढरपुरात झालेल्या धनगर समाजाच्या बैठकीत हा निर्णय घेण्यात आला होता. धनगर समाजाने भाजपास मोठ्या आशेने मतदान केले होते. पण धनगर समाजाच्या मतांच्या जोरावर राज्यात आणि केंद्रात सत्ता मिळवल्यानंतर देखील सरकारने आरक्षणाबाबत अद्याप निर्णय घेतला नाही, त्यामुळे धनगर समाज नाराज आहे.