मोदींच्या हेलिकॉप्टरमधील ‘त्या’ काळ्या बॉक्समध्ये काय होते? कॉंग्रेसकडून चौकशीची मागणी

नवी दिल्ली: काँग्रेसने एक व्हिडीओ शेअर करत भाजपा आणि पंतप्रधान नरेंद्र मोदींना घेरण्याचा प्रयत्न केला आहे. या व्हिडीओमध्ये पंतप्रधान मोदींचे हेलिकॉप्टर लॅण्डिंग झाल्यानंतर त्यांच्यासोबत एक काळ्या रंगाचा बॉक्स हेलिकॉप्टरमधून उतरविला जातो व तो दुसऱ्या गाडीत टाकला जात असल्याचे दिसून येत आहे. यावरून कॉंग्रेसने त्या काळ्या बॉक्समध्ये काय होते? याची चौकशी करण्यात यावी अशी मागणी केली आहे.

यूथ काँग्रेस मीडिया इनचार्ज श्रीवत्स यांनी व्हिडीओ ट्विटरवर शेअर केला आहे. द टेलिग्राफने दिलेल्या वृत्तानुसार, काँग्रेस प्रदेशाध्यक्ष दिनेश गुडू राव यांनीदेखील हा व्हिडीओ शेअर केला आहे. त्यांनी लिहिलं आहे की, ‘चित्रदुर्गा येथे पंतप्रधान नरेंद्र मोदींच्या हेलिकॉप्टरमधून एक रहस्यमयी बॉक्स उतरवण्यात आला आणि एका खासगी इनोव्हा गाडीत ठेवण्यात आला. ती कार लगेच तिथून निघून गेली. या बॉक्समध्ये काय होतं आणि ही गाडी कोणाची होती याचा तपास निवडणूक आयोगाने केला पाहिजे’.

श्रीवत्स यांनी हा बॉक्स सेक्युरिकी प्रोटोकॉलचा भाग का नव्हता ? इनोव्हा पंतप्रधान नरेंद्र मोदीच्या ताफ्याचा भाग का नव्हती ? ही कार कोणाची होती ? असे अनेक प्रश्न उपस्थित केले आहेत. पण व्हिडीओत कुठेही हा बॉक्स पंतप्रधान नरेंद्र मोदींच्या हेलिकॉप्टरमधून उतरवला जात असल्याचे दिसत नाही आहे. व्हिडीओत कोपऱ्यात फक्त हेलिकॉप्टरचे ब्लेड दिसत आहे. वृत्तपत्रानुसार, निवडणूक आयोगाने आपल्याकडे यासंबंधी माहिती आल्याचं सांगितलं आहे. आम्ही तात्काळ कर्नाटकमधील मुख्य निवडणूक आयुक्तांसमोर हा मुद्दा उपस्थित केला. नाव जाहीर न करण्याच्या अटीवर अधिकाऱ्याने चौकशी करण्याचा निर्णय़ निवडणूक आयोगालाच घ्यायचा असल्याचे सांगितले.