मोदींना सांगितले होते, धार्मिक आधारावर भारताचे विभाजन नको!

बराक ओबामांनी उपटले पंतप्रधान नरेंद्र मोदींचे कान; देशातील धार्मिक ध्रुवीकरणावर ठेवले नेमकेपणे बोट
नवी दिल्ली : आपल्या कार्यकाळात भारताचे धार्मिक आधारावर विभाजन होऊ देऊ नका; असे आपण पंतप्रधान नरेंद्र मोदींना सांगितले होते, या शब्दांत अमेरिकेचे माजी राष्ट्राध्यक्ष बराक ओबामा यांनी मोदींचे कान उपटले. भारताला सांप्रदायिक, धार्मिक आधारावर वाटणे हे या देशासाठी घातक ठरेल, त्याऐवजी भारतीय समाज एकसंघ कसा राहील, याचेच प्रयत्न व्हावेत. येथील मुसलमानही आपली ओळख भारतीय म्हणूनच सांगतात, असेही ओबामांनी सांगितले. नवी दिल्ली येथे हिंदुस्थान टाईम्स लीडरशिप समीटमध्ये ते बोलत होते. यावेळी त्यांनी मोदींचे काम आवडत असले तरी माजी पंतप्रधान डॉ. मनमोहन सिंग हेच आपले खरे मित्र आहेत, अशी कबुलीही ओबामांनी दिली. डॉ. सिंग जेव्हा बोलतात तेव्हा सगळे जग त्यांचे बोलणे गांभिर्याने ऐकते, कारण शेवटी ते अर्थतज्ज्ञ आहेत, असेही ओबामा म्हणाले.

मोदी आवडतात; पण मनमोहन सिंगच मित्र!
पंतप्रधान नरेंद्र मोदी मला आवडतात. त्यांच्याकडे चांगला दृष्टीकोन आहे. भारतातील प्रशासकीय व्यवस्थेचे आधुनिकीकरण करण्याचे काम ते करत आहेत; परंतु माजी पंतप्रधान डॉ. मनमोहन सिंग हेच माझे चांगले मित्र आहेत, असे वक्तव्यही ओबामा यांनी केले आहे. नरेंद्र मोदी आणि ओबामा यांच्यातील मैत्रीपूर्ण संबंधावर माध्यमांमध्ये नेहमी चर्चा रंगते. ओबामा यांच्या भारत दौर्‍यात मोदींनी ‘माझे मित्र बराक’असा उल्लेख केला होता. शुक्रवारी कार्यक्रमात ओबामांना याबाबत प्रश्न विचारण्यात आला. स्मितहास्य करत ओबामा काही क्षण थांबले आणि म्हणाले, मला मोदी आवडतात. ते देशाच्या प्रशासकीय व्यवस्थेच्या आधुनिकीकरणासाठी मेहनत घेत आहेत. पण माजी पंतप्रधान मनमोहन सिंग हेदेखील माझे चांगले मित्र आहेत, असे त्यांनी सांगितले.

आर्थिक मंदीच्या काळात डॉ. सिंग यांची खूप मदत झाली!
माध्यम प्रतिनिधींशी बोलताना ओबामा म्हणाले, 2009 मधील आर्थिक मंदीच्या काळात डॉ. मनमोहन सिंग यांची खूप मदत झाली होती. भारत- अमेरिका संबंधांवरही ओबामा यांनी भाष्य केले. भारत आणि अमेरिका एकत्र आल्यास जगातील कोणत्याही समस्येवर तोडगा काढता येईल, असे त्यांनी सांगितले. बराक ओबामा यांनी यापूर्वीही मनमोहन सिंग यांचे कौतुक केले आहे. एका परिषदेत ओबामा म्हणाले होते की, मनमोहन सिंग जेव्हा बोलतात तेव्हा सर्वांचे लक्ष त्यांच्याकडेच असते. शेवटी ते उत्तम अर्थतज्ज्ञ आहेत. डॉ. सिंग यांच्या अमेरिका दौर्‍यात ओबामांनी या मैत्रीचा उल्लेख केला होता. डॉ. सिंग यांच्या अमेरिका दौर्‍यात ओबामा शिरस्ता सोडून सिंग यांना निरोप देण्यासाठी ओव्हल कार्यालयाच्या दरवाजापर्यंत सोडायला जात होते.