मोदी अविवाहित असल्याच्या आनंदीबेन यांच्या वक्तव्याला जसोदाबेन यांनी दिले उत्तर

अहमदाबाद : पंतप्रधान नरेंद्र मोदी ‘अविवाहीत’ असल्याचे नुकतंच मध्यप्रदेशच्या राज्यपाल आनंदीबेन पटेल यांनी एका जाहीर कार्यक्रमात सांगितले होते. यानंतर नरेंद्र मोदी यांच्यापासून दूर राहणाऱ्या त्यांच्या पत्नी जसोदाबेन यांनी आनंदीबेन यांच्या वक्तव्यावर आक्षेप घेतला आहे. ‘एका शिक्षित महिलेचे (आनंदीबेन) एका शिक्षेकेबद्दल असे म्हणणे अयोग्य आहे. त्यांच्या या वक्तव्याचा भारताच्या पंतप्रधानांच्या प्रतिमेवरही वाईट परिणाम होऊ शकतो. मोदी माझ्यासाठी आदरणीय आहेत, ते माझ्यासाठी राम आहेत’ असे जसोदाबेन यांनी सांगितले आहे.

यावर प्रतिक्रिया विचारल्यावर जशोदाबेन यांनी ‘मोदी अविवाहीत असल्याच्या वक्तव्यावर मी हैराण असल्याचे म्हटले आहे. २०१४ च्या लोकसभा निवडणुकीदरम्यान आपला अर्ज दाखल करताना खुद्द मोदींनीच आपण विवाहीत असल्याचे सांगितले होते. त्या कागदपत्रांवर त्यांनी माझ्या नावाचाही उल्लेख केला आहे असेही त्यांनी सांगितले आहे.

जसोदाबेन यांचा हा व्हिडिओ सोशल मीडियावर फिरतो आहे. त्यांच्या भावानी हा व्हिडिओ शूट केला आहे. ‘आनंदीबेन यांच्या वक्तव्यावर पहिल्यांदा आमचा विश्वासच बसला नव्हता. पण, नंतर मात्र आम्ही याचं उत्तर देण्याचा निर्णय घेतला. आम्ही आमच्या घरीच मोबाईल फोनवर जसोदाबेन यांचा व्हिडिओ रेकॉर्ड केला, असं जसोदाबेन यांचे भाऊ अशोक मोदी यांनी सांगितले आहे.