मोबाईलची रस्त्यावर खुले आम अल्पकिंमतीत विक्री

पनवेल : गावाकडे जायचे आहे, बसभाड्यासाठी पैसे नाहीत, अडचणीत आहोत, असे सांगून आपल्याकडील मनगटी घड्याळ, रेडिओ, कॅमेरा घ्या; पण थोडे पैसे द्या, अशी विनवणी करणाार्‍या महिला पनवेलमध्ये नेहमी दिसून येत आहेत. पाचशे रुपये किमतीचे घड्याळ अवघ्या दोनशे रुपयांना देण्यास तयार आहोत, असा आगळावेगळा मार्केटिंग फंडा वापरून निकृष्ट दर्जाची वस्तू गळ्यात मारली जात असे. तोच फंडा वापरून आता भर रस्त्यात अशाच पद्धतीने ब्रँडेड कंपन्यांचे मोबाईल विकले जात आहेत. ते मोबाईल चोरीचे असल्याची शंका उपस्थित केली जात आहे. पनवेल बस आगारातून रेल्वे स्टेशनकडे जाणार्‍या मार्गावर येथे खेड्यातील महिलेचा पेहराव असलेल्या तीन चार महिला आपल्या लहान मुलीसमवेत मोबाईल विक्री करत असल्याचे आढळून येत आहे.

विविध बहाणे करुन फोन खरेदी करण्याची ग्राहकांना विनवणी करणार्‍या महिला शक्यतो महाविद्यालयीन तरुण-तरुणीजवळ जातात. परंतु एकापेक्षा अनेक व्यक्ती मोबाईल घेण्यास आल्यानंतर पिशवीतून अनेक मोबाईल काढले जाऊ लागले, तेव्हा ही महिला अडचणीत नसून अडचणीत आणू शकते, हे काहींच्या लक्षात आली. त्यामुळे पनवेल शहरातील रेल्वे स्टेशन मार्गावर किमती मोबाईल, भाजीच्या दराप्रमाणे कमी किमतीचा दर ठरवून मोबाईल खरेदी करता येतो. ही बाब कमी किमतीत मोबाईल घेण्यास गेलेल्यांना खटकली. चोरीचा मोबाईल असावा, अशी शंका काहींनी व्यक्त केली. या महिलांकडे पोलिसांची वक्रदृष्टी फिरली नाही याबाबत मात्र शंका व्यक्त केली जात आहे. त्यामुळे अशा रस्त्यावर मोबाईल विकणार्‍या महिलांवर कारवाई करण्याची मागणी केली जात आहे.

हँडसेट घ्यायचा असेल, तरी दुकानात डमी मॉडेल दाखवले जाते. बॉक्स उघडून मोबाईल हँडसेट हातात दिला जात नाही. कमीत कमी किमतीचा, तसेच महागडा मोबाईलसुद्धा हातात दिला जात नाही. खरेदी करणार असाल, तरच बॉक्स उघडून हँडसेट दाखवतो, असे दुकानदार अथवा सेल्समन सांगतो. मोबाईल खरेदीच्या तयारीने खिशात पैसे घेऊन गेले असले, तरी जोपर्यंत मोबाईल घेण्याबद्दल ग्राहक निश्चितपणे सांगत नाही. तोपर्यंत पाहण्यासाठीसुद्धा दुकानदार त्याच्या हातात मोबाईल देत नाही.