मोबाईल, पाकिट लांबविणारे तीघे चोरटे अवघ्या काही तासातच अटकेत

जळगाव लोहमार्ग पोलिसांची कामगिरी

जळगाव – येथील रेल्वेस्थानकावरुन महाराष्ट्र एक्सप्रेसने अकोलाकडे जात असलेल्या नितीनकुमार विलास चौधरी रा. नेरीनाका, तुकारामवाडी यांचा मोबाईल, व 330 रुपये असलेले खिशातील पाकिट असा एैवज लांबविल्याची घटना मंगळवारी सकाळी 9 वाजेच्या सुमारास घडली. या घटनेतील अमरावतीच्या तीनही चोरट्यांना जळगाव लोहमार्ग पोलिसांनी अवघ्या काही तासातच अटक करुन मुद्देमाल हस्तगत केला आहे.

नितीनकुमार विलास चौधरी हे अकोला जाण्यासाठी मंगळवारी सकाळी जळगाव स्थानकावर आले. यादरम्यान चढत असतांना चोरट्यांनी त्यांचा मोबाईल व खिशातील पाकिट लांबविले होते. याप्रकाराची माहिती मिळतात पोलीस निरिक्षक दिनकर डंबाले यांच्या मार्गदर्शनाखाली पोलीस हवालदार अनिंद्र नगराळे, रामराव इंगळे, रविंद्र ठाकूर, रेल्वे सुरक्षा बलाचे सहाय्यक फौजदार प्रसाद सिंग, भुषण पाटील, महेंद्र कुशवाह यांनी अवघ्या तासातच रेल्वे स्थानकावरुन संशयास्पद फिरणार्‍या सईदखान बादरखान वय 50, प्रविण विजय चौधरी वय 21 दोघे रा. अमरावती यांना ताब्यात घेतले. त्यांची चौकशी केली असता, मुद्देमाल घेवून साथीदार एक्स्प्रेसने भुसावळकडे रवाना झाल्याचे सांगितले. त्यानुसार पथकाने तिसरा संशयित सुरेश गोपाळराव अगले वय 45 यास भुसावळहून ताब्यात घेतले. तिघांची झडती घेतल्यावर मोबाईल तसेच पाकिट मिळून आले. दरम्यान या तिघांविरोधात अमरावती पोलीस ठाण्यात अनेक गुन्हे दाखल असल्याची माहिती मिळाली आहे. त्यांना बुधवारी भुसावळ रेल्वे न्यायालयात हजर करण्यात येणार आहे.