म्हाडाची 800 घरांसाठी लॉटरी

मुंबई : जुलै महिन्याच्या पहिल्या पंधरवड्यात म्हाडाच्या मुंबईतील सुमारे 800 घरांसाठी जाहिरात दिली जाणार आहे, अशी माहिती म्हाडाचे मुख्य कार्यकारी अधिकारी आणि उपाध्यक्ष मिलिंद म्हैसकर यांनी दिली. मुंबई म्हाडासाठी दरवर्षी 31 मेपर्यंत लॉटरी निघते. पण अजूनही जाहिरात न आल्याने यावर्षी लॉटरी नसेल, असे अंदाज बांधले जात होते. मात्र, यावर्षी उशीर झाला असला तरीही ऑगस्टमध्ये लॉटरी जाहीर केली जाईल, हे स्पष्ट करण्यात आले आहे.

ज्या घरांसाठी लॉटरी असेल, ती घरे पवई, चारकोप, विक्रोळी, कांदिवली, गोरेगाव, सायन, मानखुर्द आणि मुलुंड या भागांत आहेत. सर्व औपचारिकता पूर्ण झाल्यानंतर यादी जाहीर केली जाईल, असे म्हाडाकडून सांगण्यात आले आहे. मुंबईत घरे परवडत नाही. त्यामुळे अनेकांना म्हाडाच्या लॉटरीची प्रतीक्षा असते.