यात्रेकरुंचे जीव वाचवणार्‍या ड्रायव्हर सलीमला सलाम!
वलसाड । जम्मू काश्मीरमध्ये एका मसिहानं अनेक शिवभक्तांचे प्राण वाचवले आहेत. ज्या ओम ट्रॅव्हल्सच्या बसवर दहशतवाद्यांनी हल्ला केला, त्या बसच्या चालकाने प्रसंगावधान दाखवून अनेक भाविकांचा जीव वाचवला. सलीम शेख असे या बस चालकाचे नाव आहे. ते गुजरातमधील वलसाडचे रहिवाशी आहेत. अमरनाथ रस्त्यावर जात असताना दहशतवाद्यांनी अचानक हल्ला केला. मात्र या परिस्थितीतही सलीम डगमगले नाहीत. दहशतवाद्यांकडून गोळ्यांचा वर्षाव होत असतानाही ते बस चालवत राहिले आणि प्रवाशांना सुरक्षित ठिकाणी पोहचवले. त्यांच्या याच धाडसामुळे आज अनेक शिवभक्त सुखरुप आहेत. ही बातमी समजताच शेख परिवाराच्या आनंदाला पारावार उरला नाही.
गोळीबारातही बस सुसाट पळवली
दहशतवाद्यांनी बसवर गोळीबार केला, त्यावेळी सलीम यांनी प्रसंगावधान दाखवले. सलीम यांनी त्या परिस्थितीतही बस मिलिट्री कॅम्पपर्यंत आणली. सलीम नसते, तर या हल्ल्याची तीव्रता आणखी वाढली असती. ज्या बसवर हल्ला झाला त्या बसमध्ये 56 प्रवासी होते. यापैकी 7 जणांचा मृत्यू झाला, तर 19 जण जखमी झाले आहेत.