यापुढेही दररोज बदलत राहणार पेट्रोल, डिझेलचे दर

नवी दिल्ली । पेट्रोल – डिझेलचे दर यापुढेही दररोज बदलणार असल्याचे नवनिर्वाचित पेट्रोलियम मंत्री धर्मेंद्र प्रधान यांनी स्पष्ट केले. मागील दोन महिन्यांमध्ये पेट्रोलच्या दरात साडेसहा रुपयांची वाढ झाली आहे. त्याच पार्श्वभूमीवर यापुढेही पेट्रोल आणि डिझेलचे दर दररोज बदलत राहणार का, असा प्रश्न प्रधान यांना विचारण्यात आला. यावर दर दररोज बदलणे सामान्य ग्राहकासाठी फायदेशीर असल्याचे त्यांनी सांगितले.

पेट्रोल आणि डिझेलचे दर दररोज बदलत असल्याने आंतरराष्ट्रीय बाजारात इंधनाचे दर कमी झाल्यास त्याचा फायदा लगेच नागरिकांना मिळतो. याशिवाय इंधनाच्या दरांमध्ये वाढ झाल्यास ती एकाएकी न होता हळूहळू लागू होते.

-धर्मेंद्र प्रधान

निर्णयात बदल होणार नाही
पेट्रोलिय मंत्रिपदाचा स्वतंत्र कारभार असलेल्या धर्मेंद्र प्रधान यांना रविवारी झालेल्या मंत्रिमंडळ विस्तारात कॅबिनेट मंत्री पदावर बढती मिळाली. याशिवाय त्यांच्याकडे कौशल्य विकास खात्याचा पदभारदेखील देण्यात आला. सरकारी मालकीच्या इंधन कंपन्यांनी जून महिन्यात पेट्रोल आणि डिझेलचे दर प्रत्येकी 15 दिवसांनी बदलण्याच्या जुन्या परंपरेला मूठमाती दिली. 3 जुलैनंतर पेट्रोल, डिझेलचे दर सतत वाढत आहेत.

दर 6.6 रुपयांनी वाढून 69.66 रुपये प्रति लिटरवर झाले. डिझेलच्या दरांमध्ये 4 रुपयांनी वाढ झाली आहे. त्यामुळे डिझेलचे दर 57.38 रुपयांवर गेले.