यावलमध्ये किरकोळ कारणावरून राडा; सहा जण जखमी

भंगार साहित्य घराबाहेर ठेवल्याने दोन गटात उफाळला वाद ; तिघांची प्रकृती चिंताजनक

यावल– शहरातील खाटीक वाड्यात भंगार साहित्य घरासमोर का ठेवले? या कारणावरून दोन गटात झालेल्या तुंबळ हाणामारीत एकाच कुटुंबातील सहा जण गंभीर जखमी झाले तर यातील तिघांची प्रकृती गंभीर असून त्यांच्यावर जिल्हा रुग्णालयात उपचार सुरू आहेत. मंगळवारी सकाळच्या सुमारास ही घटना घडली.

भंगार साहित्य घराबाहेर बाहेर ठेवल्याचा राग अनावर
बाबूजीपुरा भागातील खाटीक वाडा भागातील रहिवासी बिस्मिल्ला नथ्थू खाटीक यांनी या प्रकरणी फिर्याद दिली. मंगळवारी साडेआठ वाजण्याच्या सुमारास त्यांच्या घरासमोर शफी अलाऊद्दीन खाटीक यांनी काही भंगार साहित्य टाकले. घरासमोर भंगार साहित्य का टाकले? असा जाब संशयीतांना विचारल्यानंतर शफी खाटीकसह कमरोद्दीन अलाऊद्दीन खाटीक, रफीक अलाऊद्दीन खाटीक, खालीद अलाऊद्दीन खाटीक, मो.अली कमरोद्दीन खाटीक, साबीर नबी खाटीक (सर्व रा. खाटीक वाडा, यावल) व इमरान अकबर खाटीक (रा. रावेर) या सात जणांनी लाठ्या-काठ्या व लोखंडी रॉडने हल्ला चढवला.

तीन जण गंभीर जखमी
मारहाणीत शेख नथ्थू शेख महेबुब खाटीक (78) , सज्जाद नबाब खाटीक (30) व शबानाबी दस्तगीर खाटीक (30) यांच्या डोक्यावर लोखंडी रॉडने वार केल्याने जबर दुखापत झाली. त्यांची प्रकृती गंभीर आहे. जुनेद दस्तगीर खाटीक, अलताफ बिस्मिल्ला खाटीक व फिर्यादी बिस्मिल्ला खाटीक यांनादेखील किरकोळ दुखापत झाली आहे. यातील पाच जणांवर यावल येथे ग्रामीण रुग्णालयात डॉ. रश्मी पाटील यांनी प्रथमोपचार केल्यानंतर त्यांना जिल्हा सामान्य रूग्णालयात हलविण्यात आले आहे.