यावल महाविद्यालयातील शिक्षकेतर कर्मचारी संपावर

यावल- कला, वाणिज्य व विज्ञान महाविद्यालयातील शिक्षकेतर कर्मचारी महासंघाच्या आदेशानुसार 5 मार्चपासून विविध मागण्यांसाठी बेमुदत संपावर असल्याची माहिती शिक्षकेतर कर्मचारी महासंघाचे जिल्हा उपाध्यक्ष व कार्यालय अधीक्षक आर.ई.पाटील व लेखापाल किरण देशमुख यांनी एका पत्रकान्वये दिली.
गुरुवारी संपाचा तिसरा दिवस होता.

या मागण्यांसाठी कर्मचारी संपावर
शासनाच्या आश्वासित प्रगती योजनेंतर्गत 12 किंवा 24 वर्ष सेवा करणार्‍या कर्मचार्‍यांना पदोन्नती तसेच वेतनवाढ देण्यात आली होती मात्र शासनाने या योजनेची आर्थिक विभागाकडून मान्यता घेतली नसल्यामुळे डिसेंबर 2018 व जानेवारी 2019 मध्ये योजना रद्दबाबत जीआर काढले. त्यामुळे शासनाने काढलेल्या योजना रद्द बाबतच्या जीआरमुळे महाविद्यालयीन कर्मचार्‍यांवर अन्याय होत असून हे जीआर रद्द करण्यात यावे आणि महाविद्यालयीन कर्मचार्‍यांना या योजनेचा लाभ सुरू रहावा यासाठी यावल महाविद्यालयातील कर्मचारी महाविद्यालयाच्या आवारात बेमुदत संपावर गेलेले आहेत. या संपात एकूण 18 शिक्षकेतर कर्मचारी सहभागी झालेले आहेत.