यासिन मर्चंटची खुल्या हँडिकॅप स्नूकर विजयी आगेकूच

मुंबई । खुल्या हँडिकॅप स्नूकर स्पर्धेत यासिन मर्चंट याने हँडिकॅप +3 गुणांसह खेळताना रोहन साकळकरचा 3-1 असा पराभव करुन 9 – रेड विजयी कूच केली. अनुभवी सिध्दार्थ पारिखला चांगल्या सुरुवातीनंतरही रेयान रझमीविरुध्द 2-3 असा पराभव पत्करावा लागल्याने स्पर्धेतून गाशा गुंडाळावा लागला. माटुंगा जिमखाना येथे सुरु असलेल्या या स्पर्धेत दोन वेळचा आशियाई स्नूकर विजेत्या यासिनने आपल्या लौकिकानुसार अचूक स्ट्रोक्सचे प्रदर्शन करताना रोहनचा 50-41, 13-46, 52-33, 59(33)-41 असा पराभव केला.

अनिश झवेरी, शैलेश राव आणि मानव पांचाळ विजयी
दुसर्‍या फ्रेममध्ये रोहनने वरचढ ठरताना यासिनला झुंजवण्याचा प्रयत्न केला. परंतु, यानंतर यासिनने सलग दोन फ्रेम जिंकताना सहज बाजी मारली.त्याचवेळी, अनुभवी सिध्दार्थच्या पराभवाने स्पर्धेत खळबळ माजली. सिध्दार्थनेही हँडिकॅप +3 गुणांसह खेळताना चांगली सुरुवात केली. सुरुवातीचे दोन फ्रेम जिंकून त्याने 2-0 अशी दमदार आघाडीही घेतली होती. परंतु, यानंतर रेयानने जबरदस्त पुनरागमन करताना सलग तीन फ्रेम जिंकताना 24-68(44), 25-69, 59-48, 52-3, 46-0 अशी बाजी मारली.त्याचप्रमाणे अनिश झवेरी, शैलेश राव आणि मानव पांचाळ यांनीही आपआपल्या सामन्यात बाजी निर्णयाक विजयाची नोंद करताना स्पर्धेत विजयी आगेकूच केली.