यासीन भटकळवर आरोपनिश्चिती

नवी दिल्ली : दिल्लीतील प्रसिद्ध जामा मशिदीतील स्फोट आणि गोळीबारप्रकरणी मंगळवारी दिल्लीच्या स्थानिक न्यायालयाने इंडियन मुजाहिद्दीनचा दहशतवादी यासीन भटकळविरोधात आरोपनिश्चिती केली. या प्रकरणी 23 ऑक्टोबररोजी पुढील सुनावणी पटियाला हाऊस न्यायालयात होणार आहे.

2010 ची घटना
19 सप्टेंबर 2010 रोजी जामा मशिदीजवळ एक स्फोट झाला होता. या स्फोटाअगोदर इंडियन मुजाहिद्दीनच्या दोघा जणांनी एका बसवर गोळीबार केला होता, ज्या बसमधून परदेशी नागरिक उतरत होते. याप्रकरणी इंडियन मुजाहिद्दीनचा सहसंस्थापक यासीन भटकळ याच्यासह संघटनेच्या तीन सदस्यांविरोधात पोलिसांनी आरोपपत्र दाखल केले होते. दिल्लीत झालेल्या कॉमन वेल्थ गेम्सदरम्यान परदेशी खेळाडूंना आणि त्यांना पाठिंबा देण्यासाठी येणार्‍या परदेशी नागरिकांमध्ये दहशत पसरवण्यासाठी या आरोपींनी स्फोट घडवून आणल्याचा आरोप त्यांच्यावर ठेवण्यात आला होता.

तिघे यापूर्वीच आरोपमुक्त
याप्रकरणी यापूर्वी न्यायालयाने इंडियन मुजाहिद्दीनचे तीन सदस्य सैय्यद इस्माइल आफाक, अब्दुस सबूर आणि रियाज अहमद सईदी यांना आरोपमुक्त केले होते. या तिघांविरोधात पुरेसे पुरावे नसल्याने त्यांची मुक्तता करण्यात आल्याचे न्यायालयाने सांगितले होते. आता या प्रकरणी 23 ऑक्टोबररोजी पुढील सुनावणी पटियाला हाऊस न्यायालयात होणार आहे.