‘युनायटेड’ला कमी लेखण्याची चूक भोवली

लंडन । युनायटेडला कमी लेखण्याची चूक चेल्सीला चांगलीच भोवली. मँचेस्टर युनायटेडने चेल्सीचा पराभव करून प्रीमियर लीगमधील रंगत वाढवली. मार्कस् रॅशफोर्ड आणि देर हेरेरा यांच्या गोलमुळे युनायटेडने चेल्सीला 2-0 असे हरवले. चेल्सीची चार सामन्यांतील ही दुसरी हार असल्यामुळे त्यांची आघाडी चार गुणांपर्यंतच आली आहे. टॉटनहॅमने चेल्सीची आघाडी कमी करताना बाऊरनेमाऊथला यापूर्वीच 4-0 असे हरवले होते.

युनायटेडसाठी हा विजय फार महत्वाचा होता. गतवर्षी ऑक्टोबरमध्ये जोस मॉरिन्हो यांनी संघाची सूत्रे घेतल्यानंतर काही दिवसांतच युनायटेड चेल्सीविरुद्ध 0-4 पराजित झाला होता. त्यातच गेल्या महिन्यात एफए कप स्पर्धेतील उपांत्यपूर्व फेरीत चेल्सीने युनायटेडचा पाडाव केला होता. या पार्श्वभूमीवर युनायटेडसाठी हा विजय मोलाचा आहे. युनायटेड लीगमधील 22 सामन्यांत अपराजित आहेत. या लीगमधील चार संघ चँपियन्स लीगसाठी पात्र ठरतात. युनायटेड, आर्सेनल, एव्हर्टन या पाच ते सात क्रमांकांवरील संघांना पहिल्या चार संघांत येण्याची संधी आहे. त्यातील आर्सेनल आघाडीवरील चार संघांपेक्षा तीन लढती कमी खेळले आहेत. लिव्हरपूलने (66) वेस्ट ब्रामविच ल्बियनला 1-0 हरवून पुन्हा तिसरा क्रमांक मिळविला. मँचेस्टर सिटी (64) चौथ्या; तर युनायटेड (60) पाचव्या क्रमांकावर आहे. युनायटेड पाचवा असला तरी तो आघाडीवरील चार संघांपेक्षा एक सामना कमी खेळला आहे.