युवासेनाप्रमुख आदित्य ठाकरे आता शिवसेनेचे नेते

शिवसेनेच्या राष्ट्रीय कार्यकारिणीच्या बैठकीत घोषणा

मुंबई: शिवसेनची युवा ब्रिगेड चालविणारे युवासेना अध्यक्ष आदित्य ठाकरे यांची मंगळवारी शिवसेनेच्या युवानेतेपदी नियुक्ती करण्यात आली आहे. वरळी येथील एनएसआयसीच्या पटांगणावर पार पडलेल्या शिवसेनेच्या राष्ट्रीय कार्यकारिणीच्या बैठकीत आदित्य यांच्या नियुक्तीवर शिक्कामोर्तब करण्यात आले. तर सार्वजनिक बांधकाम मंत्री एकनाथ शिंदे यांच्याकडेही आता नेतेपदाची धुरा सोपविण्यात आली आहे. शिवसेनेचे ज्येष्ठ नेते मनोहर जोशी आणि सुधीर जोशी यांचे नेतेपद कायम ठेवण्यात आले आहे.

शिवसेनेच्या राष्ट्रीय कार्यकारिणीच्या बैठकीत पक्षांतर्गत मोठ्या प्रमाणावर फेरबदल करण्यात आले. यावेळी आदित्य यांची शिवसेना नेतेपदी नियुक्ती करतानाच मनोहर जोशी आणि सुधीर जोशी यांचे नेतेपद कायम ठेवण्यात आले. त्याशिवाय चंद्रकांत खैरे आणि आनंदराव अडसूळ यांनाही नेतेपदी बढती देण्यात आली आहे. राज्यमंत्री गुलाबराव पाटील यांनी आदित्य ठाकरे यांच्या नावाची शिवसेना नेतेपदासाठी निवड झाल्याची घोषणा केली. त्यानंतर संपूर्ण सभागृहात जल्लोष झाला. तसेच जोरदार फटाके वाजण्यात आले. यावेळी केंद्रीय निवडणूक आयोगाचे मुख्य कार्यकारी अधिकारी अॅड. बाळकृष्ण जोशी यांनी निवडणुकीचे कामकाज पहिले. सध्या शिवसेनेत ८ नेते तर ३१ उपनेते आहेत. आदित्य ठाकरे सोडून कोणालाही नेतेपद नको, अशी मागणी शिवसेनेतील एका गटाने केली होती. त्यामुळे एकनाथ शिंदेंच्या नावाचा निर्णय होणार नसल्याचे सांगण्यात येत होते मात्र शिंदे यांची अखेर नेतेपदी बढती झाली आहे.