योगी आदित्यनाथ राजकारणातील कलंक

कर्नाटक काँग्रेसचे अध्यक्ष दिनेश गुंडू राव यांची टीका

नवी दिल्ली : योगी आदित्यनाथ हे भारतीय राजकारणाला कलंक आहेत. उत्तर प्रदेशच्या मुख्यमंत्रीपदी बसण्यासही ते लायक नाहीत. त्यांच्यामध्ये जरा सुद्धा लाज असेल तर त्यांनी तत्काळ आपल्या पदाचा राजीनामा द्यावा, अशी घणाघाती टीका कर्नाटक काँग्रेसचे अध्यक्ष दिनेश गुंडू राव यांनी केली आहे.

योगी म्हणून संबोधायला हवे का?
ट्विटरद्वारे युपीचे मुख्यमंत्री योगी आदित्यनाथ यांच्यावर हल्लाबोल गुंडू राव यांनी म्हटले आहे की, उत्तर प्रदेशासह देशभरात सध्या उन्नाव बलात्कार प्रकरणावरून जनमाणसांत प्रचंड रोष आहे. योगी आदित्यनाथ या प्रकरणातील आरोपींना वाचवण्याचा प्रयत्न करीत असल्याचा आरोप होत आहे. योगींचा इतिहास हा गुन्हेगारी स्वरुपाचा आहे. त्यांच्यासारख्या अनेक योगी आणि कथित संतांचीही गुन्हेगारी पार्श्‍वभूमी आहे. त्यामुळे आपण आताही त्यांना योगी म्हणून संबोधायला हवे का? योंगींबरोबर कर्नाटक आणि भारतातील संतांचा भाजपा अपमान करीत आहे.

उत्तर प्रदेशात रावण राज्य
गुंडू राव म्हणाले, उन्नाव प्रकरणात भाजपा आमदारावर बलात्काराचा आरोप आहे. मात्र, अद्याप त्यांच्यावर एफआयआर दाखल झालेली नाही. या प्रकरणात सामुहिक बलात्कार झालेल्या पीडिला मारहाणही झाली आहे. पीडितेच्या वडिलांचा मृत्यू झाला आहे. मात्र, योगी अदित्यनाथ यांनी कोणतीही कारवाई केलेली नाही. उच्च न्यायालयाच्या हस्तक्षेपानंतर या प्रकरणी एफआयआर दाखल करण्यात आला त्यानंतर भाजपाच्या आमदाराला अटक करण्यात आली. कोणी खरा योगी असे करतो का? असा सवाल करीत गुंडू राव म्हणाले, योगी आदित्यनाथ यांच्या नेतृत्वाखील उत्तर प्रदेशात राम राज्य नाही तर रावण राज्य चालू आहे.