रमेश कदमची 135 कोटींची मालमत्ता जप्त करण्याचे आदेश

मुंबई । अण्णाभाऊ साठे महामंडळातील घोटाळ्याप्रकरणी अटकेत असलेले राष्ट्रवादी काँग्रेसचे निलंबित आमदार रमेश कदम यांना न्यायालयाने मोठा दणका दिला आहे. रमेश कदम यांची 135 कोटी रुपयांची जंगम आणि स्थावर मालमत्ता जप्त करण्याचे आदेश मुंबई सत्र न्यायालयातील विशेष न्यायालयाने दिले आहेत. सत्र न्यायालयाच्या आदेशानुसार गुन्हे अन्वेषण विभाग रमेश कदम यांची एकूण 135 कोटी 16 लाख 82 हजार 608 रुपयांची मालमत्ता जप्त करणार आहे. यात शेती, प्लॉट, कपेडर रोड येथील प्लॉट, औरंगाबाद इथली मालमत्ता आणि 20-25 बँक अकाऊंट, अशा एकूण 54 मालमत्ता जप्त करण्याचे आदेश न्यायमूर्ती टंकीवाला यांनी दिले आहेत.

250 कोटींचा गैरव्यवहार 3700 पानी पुरावे
अण्णाभाऊ साठे महामंडळ घोटाळाप्रकरणी आमदार रमेश कदम सध्या अटकेत असून, त्यांनी 400 कोटींपेक्षा जास्त रुपयांचा घोटाळा केल्याचे म्हटले जात आहे. पुणे-नगर रस्त्यावरील ग्रँण्ड हयात या पंचतारांकित हॉटेलमधून सीआयडीच्या पथकाने त्यांना अटक केली होती. अण्णाभाऊ साठे महामंडळात 250 कोटींचा गैरव्यवहार झाला असून त्याचे 3700 पानी पुरावे आपण लाचलुचपतसह सर्व विभागांना दिले असल्याचा दावा माजी मंत्री लक्ष्मण ढोबळे यांनी केला. या घोटाळ्याबाबत महामंडळाचे माजी अध्यक्ष आमदार रमेश कदम यांच्यावर ढोबळेंनी थेट आरोप केला आहे.

निवडणुकीत 6 कोटी 56 लाख वाटले
कोणतीही प्रक्रिया न राबवता 73 जणांची भरती उस्मानाबादच्या नेटकेंनी मुलाला, बावणेंनी मुलीला सेवेत घेतले. नियुक्त झालेल्यांना 20 लाखांचे गृहकर्ज उपलब्ध करुन दिले. त्यातले 15 लाख रुपये लाच म्हणून घेण्यात आले. अनेक कर्ज प्रकरणावर खोट्या सह्या घेतल्या. लाभार्थींचे चेक परस्पर वाटण्यात आले. महालक्ष्मी दूध संस्था, खंडाळी, बारामीत दूध संघाला 5 कोटी कागदोपत्री वाटण्यात आले. विधानसभा निवडणुकीत रमेश कदमांनी 6 कोटी 56 लाख रुपये वाटल्याचा आरोप करण्यात आला आहे.