रमेश कदम शिवीगाळ प्रकरणाची पोलीस चौकशी होणार

मुंबई । राष्ट्रवादी काँग्रेसचे निलंबित आमदार रमेश कदम शिवीगाळ प्रकरणाची पोलीस उपायुक्त स्तरावर चौकशी होणार आहे. मुंबई पोलीस आयुक्त दत्ता पडसलगीकर यांनी हे आदेश दिले आहेत. तुरुंगात असूनही रमेश कदम यांनी जेलमध्ये पोलिसांवर दादागिरी करत त्यांना अर्वाच्च भाषेत शिवीगाळ केली होती.

दरम्यान, या शिवीगाळ आणि दादागिरी प्रकरणाचा व्हिडिओ समोर आल्यानंतर पोलीस आयुक्तांनी झोन 3चे पोलीस उपायुक्त अखिलेश सिंह यांना चौकशी करून अहवाल सादर करण्याचे आदेश दिले आहेत.

आमदार रमेश कदमांची मुजोरी कायम
सरकारी कामात अडथळा निर्माण करणे, शिवीगाळ करणे या कलमांखाली रमेश कदम यांच्यावर कारवाई करण्याची तयारी मुंबई पोलिसांनी केली आहे. पण त्याआधी नेमके काय घडले, याचा अहवाल देण्याचे आदेश पोलिसांनी दिले आहेत. या प्रकरणातील सविस्तर माहिती अशी की, रुटीन चेकअपसाठी रमेश कदम यांना मुंबईतील जे. जे. रुग्णालयात आणण्यात आले होते. मात्र, कदम रुग्णालयात जाण्यास तयार नव्हते. यावेळी पोलिसांनी व्हिडिओ शूट करण्याचा प्रयत्न केला तसेच पोलीस अधिकार्‍याने रमेश कदम यांचे म्हणणे लिहून घेण्यास सांगितले. दरम्यान, या प्रकरणाची आता चौकशी होणार असल्यामुळे आमदार रमेश कदम यांच्या अडचणीत अधिक वाढ होण्याचीही शक्यता वर्तवण्यात येत आहे तसेच अण्णाभाऊ साठे महामंडळ घोटाळ्याप्रकरणी आमदार रमेश कदम अटकेत आहेत. घोटाळ्यातील या अटकेनंतर राष्ट्रवादी काँग्रेसने रमेश कदम यांना पक्षातून निलंबित केले आहे.