रसलपूर गो मांस प्रकरण : 17 जणांना रावेर पोलिसांकडून अटक

रावेर- रसलपूर येथील झालेल्या घटने संदर्भात दोन गुन्ह्यात रावेर पोलिसांनी एकूण 17 जणांना अटक केली आहे. बेकायदेशीररीत्या गोमांंस वाहतूक केल्या प्रकरणी टाटा मॅजिकच्या मालक व चालकासह सहा जणांना दोन दिवसाची पोलीस कोठडी मिळाली.गुरुवारी सकाळी आठ वाजेच्या सुमारास टाटा मॅजिक गाडी (क्रमांक एम.पी.68 पी.0137) मध्ये बेकायदेशीर गोमांस वाहतूक केल्या प्रकरणात रावेर पोलिसांनी चालक शेख वसीम शेख इस्माईल (रा.मदिना कॉलनी) व गाडी मालक शे.जमील शे.अय्युब (रसलपूर), शे.हुसेन शे.हसन (रसलपूर), शे.अफसर शे.हसन, शे.शकील शे.नुरा (रसलपूर) या सहा आरोपींना अटक केली आहे. या सहा आरोपींना रावेर न्यायालयात हजर केल्यानंतर त्यांना 7 एप्रिलपर्यंत पोलीस कोठडी सुनावण्यात आली.

11 जणांना न्यायालयीन कोठडी
रसलपुर येथे गोमांस घेवून जाणार्‍या टाटा मॅजिक गाडी जाळल्या प्रकरणी रावेर पोलिस ठाण्यात दुसरा गुन्हा दाखल झाला. या प्रकरणी स्वप्निल महाजन, प्रल्हाद संतोष महाजन, योगेश संतोष महाजन, रवींद्र वामन महाजन, महेंद्र महाजन, समाधान रमेश महाजन, राजु गोविंदा महाजन, गणेश किसन महाजन, बबलू संतोष कराड, नितीन ज्ञानेश्वर भराडी, कन्हैया किसन दहिकर (रा.बक्षीपुर) या 11 जणांना रावेर पोलिसांनी अटक केली आहे. त्यांना रावेर न्यायालयात हजर केले असता त्यांना न्यायायलयीन कोठडी मिळाली तर नंतर त्यांचा न्यायालयाने जामीन मंजूर केला.

डिवायएसपी पिंगळे तळ ठोकुन
रसलपुर येथील घटनेच्या नंतर उपविभागीय पोलिस अधिकारी नरेंद्र पिंगळे हे दोन दिवसापासून रावेर येथे तळ ठोकून आहेत. रावेर पोलीस स्टेशनला दोन वेगवेगळे गुन्हे दाखल आहेत. पोलिस निरीक्षक रामदास वाकोडे यांच्या मार्गदर्शनाखाली फौजदार अमृत पाटील, पोलिस नाईक जितेंद्र पाटील व सहकारी तपास करीत आहे. दरम्यान, रसलपुर गावात शांतता असुन पोलिस बंदोबस्त तैनात करण्यात आला आहे.