राज्यातील मच्छीमारांना बंदी, परप्रांतीयांना मात्र अभय!

मुंबई :- राज्यातील सागरी किनारपट्टीवर पावसाळ्यात राज्यातील मच्छीमारांना मासे पकडण्यासाठी बंदी घातली असून बाहेरील राज्यातील मच्छीमार मात्र मासेमारी करत असल्याची माहिती विधानपरिषद सदस्य ॲड. राहुल नार्वेकर यांनी विधानपरिषदेत दिली. यामुळे आपल्या मच्छीमार बांधवांवर मात्र उपासमारीची वेळ आली असल्याचे त्यांनी अर्धा तास चर्चेदरम्यान दिली. त्यांनी सिंधुदुर्ग जिल्ह्यातील वेंगुर्ले समुद्रात मिनी पर्ससीन नेट धारकांकडून अनधिकृत मासेमारी सुरू असल्याबाबत व त्यांच्यावर कुठलीही कारवाई केली नसल्याबाबत अर्धा तास चारचा उपस्थित केली. दरम्यान अनधिकृत आणि 12 सागरी मैल (नॉटिकल)च्या बाहेर जाणाऱ्या बोटींवर व नियमबाह्य मासेमारी करणाऱ्यांवर सागरी मासेमारी कायद्यांतर्गत कायदेशीर कारवाई करण्यात येणार असल्याची माहिती मत्स्यव्यवसाय मंत्री महादेव जानकर विधानपरिषदेत दिली. 12 नोटिकल यंत्रणेबाबत विचारले असता याबाबत अधिक माहिती नसून चर्चा करून माहिती सभागृहासमोर ठेवू असे असमाधानकारक उत्तर जानकर यांनी दिले.

कारवाई सुरू असल्याची माहिती
नीलम गोऱ्हे, जयंत पाटील यांनी विभागात कर्मचाऱ्यांची पदे रिक्त कधी भरणार आणि किती कारवाई झाली असा प्रश्न उपस्थित केला असता जानकर यांनी राज्यातील किनारपट्टीवरील भागात अनधिकृतपणे केल्या जाणाऱ्या मासेमारी संदर्भात कठोर कारवाई करण्यात येत असल्याचे सांगितले. या कारवाईमध्ये आतापर्यंत 3 हजार 531 नौकांवर कारवाई केली असून त्यामधे 27 लाख 19 हजार 558 एवढा महसूल प्राप्त झाला असून, दंड आकारणीतून 12 लाख 32 हजार रुपये इतकी रक्कम मिळाली आहे. यांत्रिकी नौकांना व्हेईकल ट्रॅकिंग सिस्टिम (व्हिटीएस) ही प्रणाली बंधनकारक करण्यात येणार असून, या प्रणालीचे नियंत्रण जिल्ह्यातील मत्स्य विभागाचे सहायक आयुक्त यांच्याकडे असणार आहे. मत्स्यव्यवसाय विभागाचे काम जलदगतीने पूर्ण होण्यासाठी आवश्यक मनुष्यबळ भरण्यात येणार असून यासंबंधातील प्रलंबित कामे लवकरात लवकर पूर्ण करण्यात येणार असून या कामात दिरंगाई करणाऱ्या अधिकाऱ्यांवर कारवाई करण्यात येईल,असेही जानकर यांनी सांगितले.

मत्स्यव्यवसाय वाढीसाठी 1 कोटी
मत्स्यव्यवसाय वाढीसाठी 1 कोटीची नवीन योजना तयार करण्यात येणार आहे. राज्यात मत्स्यव्यवसाय धोरण प्रभावीपणे राबविण्यासाठी संबंधित अधिकारी व लोकप्रतिनिधी यांच्या अध्यक्षतेखाली बैठक घेवून निर्णय घेण्यात येईल, असेही जानकर यांनी सांगितले.