राज्यातील सर्व उपसा सिंचन योजना सौर ऊर्जेवर आणा

मुंबई – नागपूरातील चार उपसा सिंचन योजनांसह राज्यतील अन्य उपसा सिंचन योजना सौर ऊर्जेवर आणण्याच्या दृष्टीने सविस्तर प्रकल्प अहवाल तयार करून प्रस्ताव महानिर्मितीकडे पाठवण्याचे निर्देश राज्याचे ऊर्जामंत्री चंद्रशेखर बावनकुळे यांनी जलसंपदा विभागाच्या वरिष्ठ अधिकाऱ्यांना दिले.

नागपूर जिल्हयातील सिंचन समस्यांबाबत मंत्रालयात आयोजित करण्यात आलेल्या बैठकीत ऊर्जामंत्र्यांनी ही सूचना केली. या बैठकीला जलसंपदा विभागाचे वरिष्ठ अधिकारी उपस्थित होते. नागपूर जिल्हयातील अंभोरा, सत्रापूर, लोधासितापारसारख्या ज्या उपसा सिंचन योजना सौर ऊर्जेवर आणता येतील त्या योजना सौर ऊर्जेवर आणण्यासंदर्भात प्रस्ताव तयार करण्याचे निर्देश ऊर्जामंत्र्यांनी दिले.

मुख्यमंत्री सौर कृषी वाहिनी योजनेत हे प्रस्ताव मंजूर करा. जलसंपदा विभागाने महानिर्मितीला तसे पत्र पाठवावे. ज्या उपसा सिंचन योजना जलसंपदा विभागाला सौर ऊर्जेवर घ्यायच्या आहेत, त्या योजनांची यादी तयार करावी. उपसा सिंचन योजनाजवळ उपलब्ध असलेल्या शासकीय जागांवर मुख्यमंत्री सौर कृषी वाहिनी ही योजना राबवता येईल. या योजनेसाठी जलसंपदाकडे जमीन उपलब्ध असल्यास ही जमीन देण्याची आपली तयारी असल्याचे जलसंपदा विभागाच्या प्रधान सचिवांनी सांगितले. उपसा सिंचन योजनांना 24 तास वीजपुरवठा देण्याच्या मागणीबाबत शासन सकारात्मक आहे.