राज्यात मंत्री नसल्याने विषय कुणाकडे मांडावे: देवेंद्र फडणवीस

नागपूर: राज्यात खातेवाटप झाले नसल्याने विषय कुणाकडे मांडावे हा प्रश्न आमच्याकडे उभा राहिला असल्याचे राज्याचे विरोधी पक्षनेते देवेंद्र फडणवीस यांनी उपस्थित केला आहे. राज्याचे उद्यापासून नागपूर येथे हिवाळी अधिवेशन सुरु होत आहे. या पार्श्वभूमीवर देवेंद्र फडणवीस यांनी टीकास्त्र सोडले आहे. राज्यात तीन पक्षांचे सरकार सत्तेवर असून, त्यांच्यामध्ये विसंवाद आहे. भरपूर वेळ असतानाही सरकारनं मंत्रिमंडळ विस्तार लांबणीवर टाकण्यात आला असल्याचे त्यांनी सांगितले.

विरोधी पक्षनेते देवेंद्र फडणवीस यांनी अधिवेशनाच्या पार्श्वभूमीवर पत्रकार परिषद घेऊन भूमिका मांडली. फडणवीस म्हणाले, आम्ही काळजीवाहू सरकार असताना अवकाळी पावसाचा फटका बसलेल्या शेतकऱ्यांच्या मदतीसंदर्भात निर्णय घेतला होता. सरकार स्थापन झाल्यानंतर पुढील मदत करून असंही म्हटलो होतो. त्यावेळी शिवसेनेचे पक्षप्रमुख आणि सध्याचे मुख्यमंत्री उद्धव ठाकरे यांनी शेतकऱ्यांना तातडीनं मदत देण्याची मागणी केली होती. शेतकऱ्यांना देण्यात येणारी मदत कमी असून, शेतमालाचं नुकसान झालेल्या शेतकऱ्यांना सरसकट हेक्टरी २५ हजार रूपये, तर बागायत शेतकऱ्यांना ५० हजारांची मदत द्यावी अशी मागणी केली होती. त्यांनीच केलेल्या मागणीची आम्ही आठवण करू देत आहोत, असं फडणवीस यांनी सांगितलं.

तीन पक्षांचं सरकार स्थापन झालं असल तरी शेतकऱ्यांना मदत करण्यासंदर्भातला निर्णय झालेला नाही. मंत्रिमंडळ बैठकीत शेतकऱ्यांची चर्चा नाही. सरकार आल्यानंतर शेतकऱ्यांना नुकसान भरपाई मिळेल अशी अपेक्षा होती, पण अद्याप मिळालेली नाही. त्याचबरोबर महाविकास आघाडीनं सरसकट कर्जमाफी आणि कोरा सातबारा करण्याचं आश्वासनं दिलं आहे. ते कधी करणार त्याचा कार्यक्रम सरकारनं जाहीर करायला हवा. पण सरकार वेळकाढूपणा करत आहे,अशी टीका फडणवीस यांनी केली.