रात्री दोन वाजता अजित डोवाल यांनी रिकामी केली मशीद
नवी दिल्ली – दिल्लीच्या निजामुद्दीन मर्कझचे प्रमुख मौलाना साद यांनी जेव्हा दिल्ली पोलीस आणि सुरक्षा यंत्रणांच्या विनंतीकडे दुर्लक्ष करत बंगलेवाली मशीद रिकामी करण्यास नकार दिला तेव्हा राष्ट्रीय सुरक्षा सल्लागार अजित डोवाल यांनी रात्री दोन वाजता जावून मशीद रिकामी करण्याचे मिशन पूर्ण केल्याचे समोर आले आहे.
तेलंगणमधील करिमनगर येथील आठ जण करोना पॉझिटिव्ह सापडल्यानंतर केंद्रीय गृहमंत्री अमित शाह आणि अजित डोवाल यांना निजामुद्दीन येथील परिस्थितीची कल्पना आली होती. यापार्श्‍वभूमीवर निजामुद्दीन येथील मशीद रिकामी करण्याचा निर्णय घेतला मात्र तेथील मौलाना सहकार्य करत नसल्याने
अमित शाह यांनी अजित डोवाल यांना तात्काळ तिथे पोहोचून तोडगा काढण्यास सांगितले. गृहमंत्रालयाच्या सुत्रांनी दिलेल्या माहितानुसार, अजित डोवाल २८-२९ मार्च रोजी रात्री दोन वाजण्याच्या सुमारास मर्कझमध्ये पोहोचले. यावेळी त्यांनी मौलाना साद यांची मनधरणी करत मशिदीमधील सर्वांची करोना चाचणी करण्यासाठी आणि क्वारंटाइन करण्यासाठी तयार केले. अजित डोवाल यांनी मध्यस्थी केल्यानंतर मर्कझकडून १६७ तबलिगी कर्मचार्‍यांची चाचणी करण्यासाठी रुग्णालयात दाखल करण्याची परवानगी दिली. अजित डोवाल यांनी गेल्या काही वर्षांमध्ये अनेक देश आणि विदेशातील अनेक मुस्लीम संघटनांशी चांगले संबंध निर्माण केले आहेत.