रामेश्‍वर कॉलनीत वृध्द दाम्पत्यांवर चौघांचा बाटल्या, फायटरने हल्ला

जखमी दाम्पत्यावर जिल्हा रुग्णालयात उपचार ; एमआयडीसी पोलिसात चौघांविरोधात गुन्हा

जळगाव – पॅजो रिक्षातून आलेल्या पाच ते सहा जणांनी घरात घुसून वृध्द महिलेसह पतीवर हल्ला केल्याची घटना रविवारी दुपारी 4.30 वाजेच्या सुमारास रामेश्‍वर कॉलनी परिसरातील एकनाथ नगरमध्ये घडली. बियरच्या बाटल्या, फायटरने केलेल्या बेदम मारहाणीत अंबादास सुकदेव वंजारी (वय-45) व पत्नी सुनिता अंबादास वंजारी (वय-40) हे जखमी झाले असून त्यांना उपचारार्थ जिल्हा रुग्णालयात दाखल करण्यात आले आहे. याप्रकरणी प्रशांत कोळी याच्यासह तिघांविरोधात एमआयडीसी पोलीस ठाण्यात गुन्हा दाखल करण्यात आला आहे.

दोन तोळ्याची पोतही लांबविली
मेहरूण परीसरातील एकनाथ नगरातील रहिवाशी अंबादास वंजारी (वय-45) हे आपल्या पत्नी सुनिता, दोन मुले व दोन सुनांसह राहतात. रिक्षा चालवून ते उदरनिर्वाह भागवितात. रविवारी सायंकाळी पॅजो रिक्षातून प्रशांत कोळी याच्यासह तीन जण आले. कोळी याने तु माझ्यावर केस होती असे म्हणून घरातील सुनिता वंजारी यांच्या डोक्यात बियरच्या बाटल्या मारत, इतर तिघांनी मारहाण करण्यास सुरुवात केली. यानंतर घरात जावून चौघांनी अंबादास वंजारी यांनाही बियरच्या बाटल्या तसेच फायरटने मारहाण केली. शेजारच्या रहिवाशांनी घराकडे धाव घेवून रक्तबंबाळ अवस्थेतही सुनीता व अंबादास वंजारी यांना जिल्हा रुग्णालयात दाखल केले. माहिती मिळताच एमआयडीसी पोलिसांनी रुग्णालय गाठले व जखमींना विचारपूस करत माहिती जाणून घेतली. जखमी अंबादास वंजारी यांच्या जबाबवरुन प्रशांत कोळी यांच्यासह तिघांविरोधात एमआयडीसी पोलीस ठाण्यात गुन्हा दाखल करण्यात आला आहे.पुढील तपास सहाय्यक फौजदार रामकृष्ण पाटील करीत आहेत.
.