राम मंदिरासाठी कायदा बनवा; उद्धव ठाकरेंचा आयोध्येत पुनरुच्चार

अयोध्या: शिवसेना पक्षप्रमुख उद्धव ठाकरे यांनी आज शिवसेनेच्या नवनिर्वाचित सर्व १८ खासदारांसोबत अयोध्येतील रामजन्मभूमीवर जाऊन प्रभू श्रीरामाचे दर्शन घेतले. यावेळी उद्धव ठाकरे यांनी प्रभू श्रीरामच्या मंदिरासाठी अध्यादेश आणावा व कायदा बनवून भव्य राम मंदिराची उभारणी करावी, या मागणीचा पुनरूच्चार केला. पहले मंदिर, फिर सरकार’ अशी घोषणा देत आधीची अयोध्यावारी करणाऱ्या उद्धव यांनी आज ‘पहले मंदिर, फिर संसद’ असा सूर लावला. उद्यापासून संसदेचे कामकाज सुरू होत असून रामलल्लाचे दर्शन घेऊनच शिवसेनेचे नवनिर्वाचित खासदार आपली नवी इनिंग सुरू करत आहेत, असे उद्धव म्हणाले.

अयोध्येत राम मंदिर व्हावे, या प्रमुख मुद्द्यावर शिवसेनेने भाजपसोबत युती केलेली आहे. आता देशात पुन्हा एकदा पूर्ण बहुमत असलेले सरकार आल्याने राम मंदिर निर्माणाला वेग आला पाहिजे, अशी अपेक्षा उद्धव यांनी व्यक्त केली. अयोध्येत भव्य राम मंदिर व्हावे, ही जनतेची भावना असून पंतप्रधान नरेंद्र मोदी हे पवित्र काम निश्चितच करतील, हा आमचा विश्वास असल्याचे नमूद करताना, या कार्यात त्यांना आमची पूर्ण साथ राहील, असेही उद्धव पुढे म्हणाले. मोदींसाठी कोणतंच काम कठीण नाही. त्यांनी अनेक अशक्य गोष्टी सहज शक्य करून दाखवलेल्या आहेत, असं कौतुकही उद्धव यांनी केलं. राम मंदिर हा निवडणुकीचा मुद्दा नाही, असेही त्यांनी एका प्रश्नाच्या उत्तरात नमूद केले.